Saýran aýdanynyń ákimshilik ortalyǵy – Shornaq aýyly bolady. Kentaý qalasynyń quramynan Shaǵa, Jańa Iqan, Eski Iqan, Úshqaıyq, Iassy, Oranǵaı, Qarashyq, Júınek, Babaıqorǵan, Shornaq, Jibek joly, Maıdantal aýyldyq okrýgteri shyǵarylyp, Saýran aýdanyna ótedi. Jańa aýdannyń qurylýyna baılanysty atqarylatyn barlyq is-sharalardyń júzege asýymen arnaıy komıssııa aınalysady. Shornaq aýylynda jańa aýdannyń qurylýyna oraı ótken saltanatty sharada Túrkistan oblysynyń ákimi О́mirzaq Shókeev Ulystyń uly kúni qarsańynda tarıhy bastaý alǵan ıgi iske atsalysqan barsha azamattarǵa alǵys aıtty. Jańa aýdannyń damý jospary jaıly oı bólisti. Aýdan quramyna enetin eldi mekenderdegi memlekettik qyzmetterdi alý sapasy kóteriledi. Áleýmettik máseleler oń sheshimin taýyp, jańa jumys oryndarynyń ashylýy sekildi mańyzdy máselelerge basymdyq beriledi. Aýyl sharýashylyǵy salasynyń qarqyndy damýyna kúsh salynady.
Qoldanystaǵy zańdarǵa sáıkes, Memleket basshysynyń aýdandy qurý týraly Jarlyǵyn oryndaý maqsatynda ákimshilik qurylymyn jasaqtaý úshin aldymen aýdandyq máslıhat qurylady. Tıisinshe máslıhat kelisimimen aýdan ákimi taǵaıyndalyp, aýdandy basqarý júıesi jáne bıýdjeti bekitiledi. Quqyq qorǵaý organdary men mınıstrlikterdiń aýdandyq bólimsheleri óz qyzmetin bastaıdy. Sondaı-aq oblys ákimi aldaǵy 1-2 jyldyń kóleminde barlyq ákimshilik, áleýmettik nysandardyń qurylysy bitip, paıdalanýǵa beriletinin atap ótti. Al ázirge memlekettik organdar men
aýdan ákimdigin qosa alǵanda ýaqytsha jekelegen nysandardy jalǵa alyp, jumysyn júrgizedi. Jańa aýdan halqynyń sany 100 myńnan asatyn bolady. Aýdan turǵyny atanǵan 100 myńnan astam halyqtyń atynan sóz sóılegen saýrandyqtar Elbasyna alǵystaryn jetkizýdi surady. Túrkistandy túrki áleminiń mádenı-rýhanı ortalyǵy atanýyna yqpal etken jáne qasıetti qalany arnaıy Jarlyǵymen oblys ortalyǵy etip bekitken Elbasy Nursultan Nazarbaevqa, Tuńǵysh Prezıdentimizdiń isin jalǵastyryp, Túrkistannyń damýyna kúsh salyp jatqan Prezıdent Qasym-Jomart Toqaevqa rızashylyqtaryn bildirdi.
Elbasy qabyldaǵan strategııalyq sheshimniń kúlli túrki jurtynyń rýhanı astanasy bolǵan Túrkistannyń qaıta túleýine úlken serpin bergeni de aıtyldy. «Bul qalamen myń jarym jyldyq tarıh sabaqtasyp jatyr. Osylaısha kezinde iri saýda ortalyǵy negizinde qurylyp, Aq ordanyń astanasy bolǵan Saýran ataýy óziniń tarıhı mártebesin qaıta aldy. Kóne shahardy oblys ortalyǵy etýdegi Nursultan Ábishulynyń bastap bergen jolynyń jalǵasy retinde Túrkistanmen irgeles jatqan Kentaý qalasyn seriktes qala retinde damytý jospary bekitildi. Osy rette qala shekarasynyń keńeıýi, turǵyndar sanynyń eki esege artýy tez arada jańa
aýdan qurýǵa sebep boldy», deıdi oblystyq máslıhattyń hatshysy Qaırat Balabıev.
Túrkistan oblysy
