Jármeńkeni dástúrli túrde Qazaqstannyń Ulybrıtanııadaǵy Elshiligi, Ulybrıtanııadaǵy qazaqstandyq doktoranttar qaýymdastyǵy jáne London ýnıversıtettik kolledjiniń qazaqstandyq qaýymdastyǵy (UCL Kazakh society) ótkizdi.
Is-sharaǵa Qazaqstannyń iri strategııalyq jumys berýshisi «Samuryq-Qazyna» UÁQ» AQ jáne onyń portfeldik kompanııalary – «Qazatomónerkásip» UAK» AQ, «Qazaqtelekom» AQ jáne «Samuryq-Qazyna» korporatıvtik ýnıversıteti (Ýnıversıtet), sondaı-aq «Eurasian Resources Group» (ERG) kompanııasy, Eýropalyq qaıta qurý jáne damý banki (EQDB), «Qazaqstan Ulttyq Bankiniń Ulttyq ınvestısııalyq korporasııasy» AQ (QUB UIK), «Astana» Halyqaralyq qarjy ortalyǵy (AHQO), Qazaqstan-Brıtan tehnıkalyq ýnıversıteti (QBTÝ) jáne basqalar qatysty.
Jármeńkeniń basty mindeti – brıtanııalyq joǵary oqý oryndarynyń qazaqstandyq túlekterine qazaqstandyq uıymdarda qyzyqty jumysqa nemese taǵylymdamadan ótýge shaqyrý alý. Jumys berýshiler, óz kezeginde, kadrlyq rezervti qalyptastyrý maqsatynda jas mamandarmen tanysý múmkindigine ıe bolady. Sondaı-aq bolashaq kásibı mamandardy tarta otyryp, olardy óz kompanııalarynyń qyzmeti týraly habardar etedi.
Qazaqstannyń Ulybrıtanııadaǵy Elshisi Erlan Ydyrysov quttyqtaý sózinde el basshylyǵynyń basty basymdyǵy jastardy qoldaý jáne eldegi sapaly adamı kapıtaldy damytý ekenin atap ótti. Ol pandemııaǵa qarsy kúreste ǵylym men bilimniń zor mańyzdylyǵyn jáne qorshaǵan ortany qorǵaý salasynda ujymdyq is-qımyl jasaý qajettigin basa aıtty.
Logıstıka jáne halyqaralyq yntymaqtastyq jónindegi Basqarýshy dırektor – «Samuryq-Qazyna» UÁQ» AQ (Qor) Basqarma múshesi Erjan Tutqyshev Qordyń portfeldik kompanııalaryn, óndiris salalaryn jáne jalpy el ekonomıkasyn damytý úshin jas jáne joǵary bilikti mamandardy tartýdyń mańyzdylyǵyna toqtaldy. Ol «Samruk Qyzmet» (https://qsamruk.kz/) atty Qor kompanııalarynyń biryńǵaı rekrýtıng platformasyn tanystyrdy. Ol platformada barlyq tilek bildirýshiler Qor tobynyń 167 uıymynyń ashyq bos oryndarymen tanysa alady. Spıkerdiń aıtýynsha, platformany engizý arqyly jumysqa alý prosesin avtomattandyrý jańa qyzmetkerlerdi jaldaýdyń ashyqtyǵyn qamtamasyz etedi.
«Qazatomónerkásip» UAK» AQ adam resýrstaryn basqarý departamentiniń dırektory Lázzat Qojahmetova jas mamandarǵa arnalǵan «Izbasar» baǵdarlamasy jaıly jáne kompanııanyń pandemııa kezindegi turaqtylyǵy týraly aıtyp, aksıonerlik qoǵam basshylyǵynyń qyzmetkerler úshin qaýipsiz orta qurýǵa erekshe nazar aýdarǵanyn aıtty.
«Qazaqtelekom» AQ personal jónindegi basqarýshy dırektory Berik Bıtabarov óz kezeginde daryndy mamandardy «Aqyldy úı», «Smart City», MSSP ónimderi, bultty servıster jáne t.b. osy sııaqty ozyq jobalarǵa qatysýǵa shaqyrdy.
Ýnıversıtet dırektory Aqmaral Qadyrbaeva jas mamandarǵa Qor portfeldik kompanııalarynyń sıfrlyq transformasııasynyń naqty jobalarynda jumys isteý úshin joǵary oqý oryndarynyń talantty túlekterin daıarlaý maqsatynda uıymdastyrylǵan «Sıfrlyq jaz» taǵylymdama baǵdarlamasymen tanystyrdy.
EQQDB Talanttardy tartý bóliminiń basshysy Pol Hıýston banktiń ınvestısııalyq strategııalary men qatysýshy elderdi ınvestısııalyq qoldaý jáne damytý baǵdarlamalary týraly aıtyp berdi.
QBTÝ prorektory Ásel Jumaseıitova jáne ýnıversıtettiń basqa da ókilderi túlekter úshin jasalǵan múmkindikter týraly aıtyp, BUU Damý baǵdarlamasy, «Honeywell», «Eni» kompanııalary, Lafboro ýnıversıteti jáne jobalar men ortalyqtardyń alýan túrlerin tanystyrdy.
AHQO úzdiksiz kásibı damytý bıýrosynyń (AHQO bıýrosy) ókili Aıda Kınjıgarınova halyqaralyq kásibı biliktilikter men lısenzııalardyń básekege qabiletti eńbek naryǵyndaǵy mańyzyn ekshelep berdi. AHQO bıýrosy taǵylymdamalardyń biregeı baǵdarlamalaryn, ACCA, CIMA jáne CFA sııaqty emtıhandarǵa daıyndyq kýrstaryn, sondaı-aq kadrlyq rezervtiń kandıdaty bolý múmkindigin usynady.
Qazaqstandaǵy «ERG» kompanııasynyń qyzmetkerler jónindegi operasııalyq dırektory Aqmaral Naızabekova kompanııanyń jumysy týraly baıandap, birinshi basshylarynyń eńbekti qorǵaý jáne kásiporyndaǵy qaýipsizdik máselelerine qatysatyny, sondaı-aq óndiristegi qaýipsizdikti qamtamasyz etýge ınvestısııa quıatyny týraly aıtty.
QUB UIK qyzmetkerlermen jumys jónindegi basqarmasynyń basshysy Beıbit Mamytov kompanııanyń strategııasymen, onyń qundylyqtarymen, sondaı-aq Ulybrıtanııanyń jetekshi joǵary oqý oryndarynyń túlekteri úshin mansaptyq ósý múmkindikterimen tanystyrdy.
Jármeńke aıasynda sheberlik sabaq pen bos laýazymdarǵa ornalasý úshin qatysýshylarmen suhbattar ótkizildi. Máselen, «Samruk Qyzmet» jobasynyń sarapshysy Elmıra Sálimova mansap qurý jáne mansaptyq ósý boıynsha sheberlik sabaǵyn uıymdastyryp, armandaǵan qyzmetke qol jetkizý úshin qajet ınsaıttarmen, laıfhaktarmen jáne naqty keıstermen bólisti.
