Májilis ókili Densaýlyq saqtaý mınıstrligi bul naýqandy júıeli uıymdastyrmaı otyr degen syn aıtty.
«Keshe Densaýlyq saqtaý mınıstri halyqty vaksınalaýǵa úndedi. Biraq qaıda baryp vaksına alýǵa bolatynyn el bilmeıdi. Sebebi óńirlerdegi emhanalarda vaksına joq», dedi depýtat. Irına Ýnjakova qazirgi ahýaldy byltyrǵy jaǵdaımen salystyrdy.
«Byltyr adamdar shatasyp, PTR-test qaıda jáne qashan tapsyrýǵa bolatynyn bilmedi. Al bıyl vaksınasııany qaıda jáne qashan alýǵa bolatynyn bilmeı otyr. Densaýlyq saqtaý mınıstrligi bıyl aldyn ala is-qımyl algorıtmin jasaı almady ma? Kóptegen adamnyń kókeıinde osyndaı suraq tur», dedi Májilis ókili. Irına Ýnjakova Izraıl, Ulybrıtanııa, Slovakııa, Slovenııa, Serbııa, Sıngapýr jáne basqa da birqatar elderde halyqtyń jartysynan 90%-na deıin vaksına alyp úlgergenin atap ótti. Al Qazaqstanda Densaýlyq saqtaý mınıstrliginiń aqparaty boıynsha, 134 myńnan astam adam vaksınasııalanǵan.
«Densaýlyq saqtaý mınıstrligi shuǵyl túrde tıisti sharalar qabyldaýy kerek. Áıtpese biz ótken jazdaǵydaı pandemııamen kúreske tolyq daıyn bolmaı shyǵýymyz múmkin», dedi Irına Ýnjakova.
Osy depýtattyq saýal arqyly «Nur Otan» partııasy fraksııasynyń músheleri óńirler boıynsha vaksına jetkizýdiń naqty josparyn, halyqtyń barlyq toptaryn vaksınalaý kestesin, sondaı-aq vaksınasııanyń barlyq pýnkteri týraly, tipti, onyń ishinde, tolyq aqparat berýdi talap etip otyr.
