Bank sarapshylarynyń boljamynsha, bıyl Urals munaıynyń baǵasy barreline 55 dollar tóńireginde bolady. Eger baǵa osy deńgeıinen qulamaıtyn bolsa, onda bul óńir elderi úshin áldeqaıda jaǵymdy áser bermek. Sarapshylar Qazaqstan men Reseı ekonomıkasyn 4 jáne 3,3 paıyzǵa ósim kórsetedi dep boljady. Al Armenııa men Qyrǵyzstanda ekonomıkalyq belsendiliktiń qalpyna kelýi tek 2022 jyly júzege asýy múmkin.
– 2020 jyldyń ortasynan beri biz aktıvter ınflıasııasynyń asa kúshti jahandyq úrdisin baıqap otyrmyz. Aqpannyń qorytyndysy boıynsha negizgi shıkizat taýarlarynyń baǵasy daǵdarysqa deıingi kezeń baǵasynan asyp ketti. Azyq-túlik baǵasy 2013 jyldan beri qatty qymbattap tur. Al metall 2011 jyldan beri osynshama qymbattamaǵan edi. Inflıasııa energııa tasymaldaý salasyn da qamtyp otyr. Jyl basynan beri munaı 20 paıyzǵa qymbattap, baǵasy daǵdarysqa deıingi kezeńge jetti. Shıkizat baǵasynyń qatty ósimi ýaqytsha faktor retinde túsindiriledi. Qytaı ekonomıkasynyń jyldam qalpyna kelýi, pandemııa kesirinen kóptegen óndiris tizbeginiń úzilip qalýy osyǵan alyp keldi. Ýaqyt óte kele bul faktorlardyń áseri tómendep, ósim baıaýlaıdy. Jaǵdaıdyń dál osylaı damýy bank boljamynyń bazalyq ssenarııine engizilgen, – deıdi banktiń bas ekonomısi Evgenıı Vınokýrov.
Zertteýshilerdiń aıtýynsha, metall jáne energııa resýrstarynyń qymbattaýy óńir úshin paıdaly. Eksport túsimi artyp, memlekettik bıýdjet tabysy kóbeıedi, eldiń ekonomıkalyq kóńil kúıi kóteriledi. «Eger 2021 jyldyń II-IV toqsanynda Urals baǵasy barreline 70 dollarǵa jaqyndasa (bul banktiń bazalyq ssenarııinen 20 paıyzǵa joǵary), onda Reseı ekonomıkasy 3,7 paıyzǵa deıin ósýi múmkin. Mundaı jaǵdaıda Qazaqstannyń ishki jalpy ónimi 4,5 paıyzǵa jetedi» degen optımıstik boljam jasalǵan.
Eýrazııalyq damý banki basqarma tóraǵasynyń orynbasary Rýslan Dálenovtiń aıtýynsha, EDB qatysýshy elderiniń ekonomıkasy pandemııa jaǵdaıyna beıimdelgen.
– 2021 jyly bank qatysýshy-elderiniń ekonomıkasynda qarqyndy qalpyna kelý ósimi bolady dep kútilip otyr. IJО́ 3,3 paıyz deńgeıine jetpek. Qatysýshy elder ekonomıkasy tipti táýekel ssenarııi jaǵdaıynda da óse beredi. Belsendi qoldaý sharalaryn qarjylandyrý úshin bıýdjet tapshylyǵynyń ósýi aıasynda EDB-ǵa múshe elderdiń memlekettik qaryzy 45,4 mlrd dollarǵa ósti. Qaryz parametrlerin turaqty dep baǵalaýǵa bolady. 2020 jyldyń qorytyndysy boıynsha Reseı men Qazaqstannyń memlekettik qaryzy IJО́-niń 18 jáne 30 paıyzyn quraıdy, – deıdi R.Dálenov.
