Uıymnyń maqsaty – túrki halyqtaryna ortaq bıznes alań qalyptastyrý, joǵary zııatkerlik jáne ınnovasııalyq salalardy qoldaý, jastar arasynda shyǵarmashylyq qýatty oıatý.
Bul týraly brıfıngte Túrkistan oblysy ákiminiń orynbasary Meıirjan Myrzalıev málimdedi.
«Túrki áleminiń rýhanı astanasy mártebesine ıe bolý, sondaı-aq tarıhı qundylyǵyn eskere otyryp, qala biregeı kreatıvti klasterdi damytýda joǵary áleýetke ıe. Bul Túrkistandy jahandyq ınnovasııalyq mádenı ortalyqqa aınaldyrýǵa múmkindik beredi. Osy maqsatta biz túrki halyqtaryna ortaq kreatıvti ındýstrııa qaýymdastyǵyn quryp otyrmyz. Bizdiń oıymyzsha, kreatıvti ekonomıkany damytý – búkil óńirdiń básekege qabilettiligin arttyrýǵa jasalatyn mańyzdy qadam», dedi Meıirjan Myrzalıev.
Sondaı-aq brıfıngke onlaın formatta qatysqan «FUTURK» Túrkitildes elderiniń kreatıvti ındýstrııa qaýymdastyǵynyń tóraıymy Elmıra Sársenalıeva Túrkistandaǵy qaýymdastyq jumysymen tanystyrdy.
«Memleket basshysy aıtqanyndaı, Túrkistan – tek mádenıettiń ǵana emes, ekonomıkanyń da ózegine aınalýy tıis. Osy maqsatta qaýymdastyq qurylyp otyr. Atalǵan alańda aldaǵy ýaqytta túrki halyqtarynyń kásipkerleri tájirıbe almasady. Bul – túrkitildes elderdiń talantty jastaryna qoldaý kórsetetin uıym bolmaq. Qaýymdastyqtyń mıssııasy – túrki halyqtaryna ortaq mádenı, týrıstik, aqparattyq orta qalyptastyrý. Bastysy, shaǵyn jáne orta kásipkerlikti qoldaý», dedi Elmıra Álimjanqyzy.
