Ujymdyq ımmýnıtet úshin vaksına saldyrýda

Qoǵam • 20 Sáýir, 2021

Ujymdyq ımmýnıtet úshin vaksına saldyrýda

Ujymdyq ımmýnıtet qalyptastyrý úshin Shymkent qalasynda vaksına saldyrý kórsetkishi arta túsýde. Búginde medısına, bilim berý, quqyq qorǵaý salasy qyzmetkerlerinen tys qala turǵyndary jappaı ekpe ektirýge kóshti. Bul úshin shahardaǵy densaýlyq saqtaý mekemelerindegi belgilengen ǵımarattardan tys saýda ortalyqtarynan vaksına saldyrý pýnktteri ashylady. Bul týraly Aqparattyq-kommýnıkasııalyq ortalyǵynda ótken brıfıngte Shymkent qalalyq densaýlyq saqtaý basqarmasynyń basshysy Baqytjan Pozılov málim etti.

Nurshat TО́KEN

«Shymkent qalasynda erikti túrde koronavırýsqa qarsy vaksına alýshylardyń sany kóbeıdi. Iаǵnı búginge deıin 46 656 adam ekpe qabyldady. Olardyń 9 570-i – medısına mamandary, 11 752-si – muǵalimder, 4 738-i – polıseıler, 3 332-si – sozylmaly aýrýǵa shaldyqqan naýqastar, al 1 326-sy stýdentter bolsa, qalǵandary – basqa da sanattaǵy azamattar. Bul rette halyqqa bar jaǵdaıdy jasaý maqsatynda vaksına egý pýnktterin kóbeıtip, saldyrý ýaqytyn uzarttyq», deıdi basqarma basshysy.

Bas dárigerdiń sózinshe, úshinshi megapolıste vaksına saldyrý 38 egý pýnktinde júrgizilip otyr. Olar kúndelikti saǵat 08.00-den 22.00-ge deıin jumys isteýde. Oǵan qosa, búgin qalanyń saýda ortalyqtarynda vaksınalaý jumystary bastalǵan. Iаǵnı №1 qalalyq emhana mamandary tańerteńnen ámbebap saýda ortalyǵynyń qyzmetkerleri men dúkenge kelýshi azamattarǵa vaksına salýda. Bul shara jalǵasady. Endigi kezekte 19 sáýirden bastap «Mega» saýda ortalyǵy men bazarlarda egý pýnktteri ashylady.

Eske salsaq, koronavırýsqa qarsy shyǵarylǵan vaksına adamǵa kúsh-qýat beretin dárýmen bolmaǵandyqtan, ony saldyrý orazany buzbaıdy. Bul týraly Qazaqstan musylmandary dinı basqarmasynyń ókilderi pátýa shyǵarǵan.

Baqytjan Joldasbekuly Shymkent qalasynda ótken táýlikte COVID-19 ınfeksııasyn juqtyrýdyń 119 jaǵdaıy tirkelgenin, epıdemııalyq ahýaldyń turaqty emes ekendigin tilge tıek etti. Osy oraıda qalanyń Bas dárigeri shahar turǵyndaryna barlyq sanıtarlyq talapty saqtaýǵa shaqyrdy.

Shym-shaharda covid-19 vırýsyna qarsy vaksına saldyrýda bilim salasynyń qyzmetkerleri belsendilik tanytyp keledi. Osyǵan deıin bilim salasynda jumys isteıtin 8 myńǵa jýyq qyzmetker vırýsqa qarsy vaksına alǵan. Bul jalpy qyzmetkerlerdiń 30 paıyzyn qurap otyr. Basqarma tarapynan qyzmetkerler arasynda qaýipti indetke qatysty vaksınany jappaı saldyrý boıynsha tıisti túsindirý jumystary atqarylyp jatyr. Bir kúnniń ishinde ortasha eseppen myńnan astam qyzmetker vaksınalandy.

Indet irgeden in qazǵan tusta jany jomart jandar elge qolushyn berýden aıanyp qalǵan joq. Jýyrda «PetroQazaqstan» jáne «Otaýmed» kompanııasy qan ortalyǵyna vaksına saqtaıtyn qurylǵy tartý etti. Kompanııa basshylary ortalyqqa qajet qurylǵylardy shetelden arnaıy tapsyryspen aldyrǵan. Medısınalyq mekemege tartý etilgen tońazytqysh jabdyqtary vaksınany saqtaýǵa arnalǵan. Ortalyq bas dárigeri Amangeldi Nurlybaev ujym atynan «PetroQazaqstan» jáne «Otaýmed» kompanııasyna alǵysyn bildirdi.

Aıta keterligi, qalaǵa bólinetin indetke qarsy vaksınalar tikeleı áýejaıdan qan ortalyǵyna jetkizilip, keıinnen egý pýnktterine taratylýda.

ShYMKENT