«Qazposhta» AQ turǵyndarǵa barynsha yńǵaıly qyzmet kórsetý úshin GoPost Home jobasyn qolǵa alyp otyr. Onyń aıasynda klıentter sálemdemeler sýpermarketine barmaı-aq, sálemdemeler men usaq paketterdiń úıge deıin jetkizilýine tapsyrys beredi. Búginde GoPost Home qyzmeti qanatqaqty joba retinde Nur-Sultan jáne Almaty qalalarynda júzege asyrylýda. Onyń ishinde bul qyzmet elordada Ortalyq operasııalyq ýchaskede jáne №20 qalalyq poshta baılanysy bólimshesinde, al Almatyda Ortalyq operasııalyq ýchaskede qoljetimdi.
Bir mekenjaıǵa 5 sálemdemege tapsyrys berýge múmkindik bar. Bul jaǵdaıda birinshisin jetkizý quny 1 myń teńgeni qurasa, qalǵan sálemdemelerdiń árqaısysy úshin tek 200 teńge tóleý qajet. Qazirgi tańda bul qyzmet Telegram-bot @KazPostBot arqyly qoljetimdi. Klıenttiń sálemdemesi sýpermarketke kelgen kezde oǵan atalǵan messendjer arqyly habarlama joldanady. Eger onyń tarapynan saǵat 16:00-ge deıin úıge deıin jetkizý rastalsa, sálemdeme sol kúni qolǵa tapsyrylady. Aldaǵy ýaqytta GoPost Home qyzmeti WhatsApp jáne 1499 baılanys ortalyǵy arqyly qoljetimdi bolady.
«Qazposhta» AQ keleshekte jańa qyzmettiń aıasyn keńeıtip, elimizdiń barlyq óńirin qamtýdy josparlap otyr. Sol arqyly keleshekte tirkeletin poshta jóneltilimderin úıge deıin jetkizý qyzmeti óńir turǵyndary úshin qoljetimdi bolmaq. Búginde «Qazposhta» AQ-ǵa qarasty sálemdemeler sýpermarketiniń sany 237-ge jetti. Onyń 127-si qalalarda, qalǵan 110-y aýdandar men aýyldarda ornalasqan.
