«Sıfrly kenish» geologııalyq barlaýdan daıyn ónimdi shyǵarýǵa deıingi tutas óndiristik sıkldi avtomattandyrýǵa múmkindik berdi. Osynyń nátıjesinde kompanııanyń operasııalyq shyǵyndary 15-20 paıyzǵa qysqardy. Tıisinshe jedel sheshimder qabyldaýǵa, sapany jaqsartýǵa, óndiris qaýipsizdigin arttyrýǵa jol ashty.
Byltyr «Altynalmas AK» kompanııasynyń Aqtoǵaı altyn óndirý fabrıkasynda brains.app platformasy bazasynda jasandy ıntellekt tehnologııalarynyń kómegimen kendi untaqtaý prosesin ońtaılandyrý júıesi engizildi. Fızıkalyq ári matematıkalyq modeldeý, mashınalyq oqytý modelderin qoldaný operatorlarǵa jumys ústinde ońtaıly sheshimder qabyldaýǵa, táýekelderdi azaıtýǵa, eńbek qaýipsizdigin kúsheıtýge jáne óndiristik prosesterdi ońtaılandyrýǵa múmkindik beredi.
Jobany qazaqstandyq Tech Garden memlekettik qory men brıtandyq IntelliSense.io kompanııasynyń birlesken kásiporny retinde qurylǵan IntelliSense-LAB tehnologııalyq damý ortalyǵy iske asyrdy. Maqsat – Indýstrııa 4.0 tujyrymdamasy sheńberinde kásiporyndarǵa jasandy ıntellekt tehnologııalaryn engizý.
«Altynalmas AK» AQ bas bıznes-keńesshisi Daryn Muńsyzbaevtyń aıtýynsha, IntelliSense-LAB komandasynyń aldyna birneshe mindet qoıylǵan. Atap aıtqanda, dıirmenge shamadan tys júk túsken kezde toqtap qalýyn azaıtý, shar deńgeıin ólsheýge baılanysty týyndaıtyn kidiristerdi boldyrmaý, baraban tósenishteriniń tozýyn baqylap, boljaý mindeti júktelgen. Sóıtip, osy úderisterdiń bárin baılanystyrý úshin dıirmenniń sıfrly túri quryldy. Ol naqty ýaqyt rejiminde úderisterdi zerdelep otyrady.
– Bul Aqtoǵaı altyn óndirý fabrıkasyna jasandy ıntellektini engizýdiń bir kezeńi ǵana. Aldaǵy úsh jyldyń kóleminde basqa da óndiristik prosesterdi sıfrlandyrý kózdelip otyr. Untaqtaý prosesin ońtaılandyrý 2020 jyly kompanııaǵa shamamen 1,3 mln dollar kóleminde artyq ónim shyǵarýǵa múmkindik berdi. Sondyqtan brains.app platformasy bazasynda jasandy ıntellekt tehnologııalaryn engizý kompanııa úshin naqty baǵyt-baǵdar bolýy kerek, – deıdi Daryn Muńsyzbaev.
Kompanııanyń IT jáne korporatıvtik damý jónindegi vıse-prezıdenti Janar Amanjolovanyń aıtýynsha, jasandy ıntellekt júıesi jumysty barynsha ashyq ári boljamdy etýge tyrysady, sondaı-aq apat kezinde toqtap qalý ýaqytyn edáýir qysqartady. Osynyń nátıjesinde kásiporynnyń ónimdiligi artady.
– «Sıfrly kenish» jasandy ıntellekt elementteri bar júıeni iske qosýdyń oń tájirıbesine aınaldy, – deıdi ol.
