Bir týyndydan-aq bir halyqtyń búkil ǵumyrbaıanyn tanýǵa bolady. Árıne, árkim óz bıiginde. Biz de alǵash altynǵa oranǵan adamdy kórip tańdaı qaqqanbyz. Álem onyń qazaqtyń qunarly topyraǵyna bitkenine qaıran qalǵan. Bizdi mádenıetten alys sanaǵandar san soqqan sol sátte. Sóıtip, tarıhtyń jańa paraǵy ashyldy. Biraq oǵan áli ne jazarymyzdy bilmeımiz. Bul da bir qasiret.
Kóńildegi oıdy kórikteı kótergen Qazaqstannyń eńbek sińirgen óner qaıratkeri Aǵymsaly Dúzelhanovtyń «Altyn adam» kartınasy. Eger tirideı kórgińiz kelse, Ulttyq mýzeıde ornalasqan. Qylqalam sheberi atalǵan shyǵarmany 1969-1970 jyldary Esik qorǵanynan tabylǵan arheologııalyq jádigerdiń áserimen jazǵan. Ásem áser boıaýǵa ulasty. Sodan soń kenep betine tarıh bitti.
Avtordyń qııalynan týǵan kórkem beıne jigerińdi shyńdaıdy. Ártúrli beınedegi altyn japsyrmalarmen bezendirilgen alqyzyl kıim men basyna konýs pishindi dýlyǵa kıgen saq jaýyngeri elimizdiń memlekettik sımvolyna aınaldy. Ol endi bógenaıy bólek áńgime. Bizdi tamsantqan – sýretshiniń syrbaz týyndysy.
Kartınanyń ortasyna atta otyrǵan jaýynger beınelengen. Altyn adamnyń basyna konýs pishindi uzyn bas kıim kıgizilgen. Jaýyngerdiń beline qyzyl bylǵarymen qaptalǵan qynapty qylysh baılansa, qolyna altyn japsyrmaly qynǵa salynǵan qanjar ustatqan. Eń qyzyǵy onyń kıimi ań stılindegi japsyrmalarmen bezendirilgen. At ábzelderiniń pishinderi de ártúrli temir japsyrmalarmen ádiptelgen.
Sýrettiń ekinshi planynan Altyn adamnyń óte kóp áskerin kóremiz. Olardyń arasynda kópti kórgen aqsaqaldar da, kúshi tasyǵan jas jaýyngerler de bar. Jaýyngerdiń júzinen batyldyq pen qaısarlyq baıqalady. Oǵan qarap turyp aldaǵy sátte Altyn adam bastaǵan myńdaǵan jaýyngerdiń joryqqa shyǵatynyna senesiz.
Sýretshi kartınanyń qurylysyna alańnyń tómengi jaǵyn paıdalanǵan. Sonyń nátıjesinde Altyn adamnyń tulǵasy alyp kórinip, kompozısııanyń ortasyna aınalady. Sonysymen jaýynger beınesiniń mańyzdylyǵy artyp, oqyrmanǵa aıbyndylyq beredi. Bizdiń oı osyndaı.
