Túrli salada eńbek etip júrgen túlekterdiń tabysty ómir jolyn jas urpaqqa nasıhattaý, olardy áleýmettik mańyzy bar jobalarǵa tartý maqsatynda uıymdastyrylǵan shara Jambyl oblysynyń ákimi Berdibek Saparbaevtyń bastamasymen ótken túlekter forýmyna ún qosý. Atalǵan jıynda Taraz qalasynyń ákimi Erjan Jylqybaev áýeli ıgi sharanyń máni men mańyzyna toqtaldy.
Sonymen qatar, ol ınvestısııa quıýǵa ári áleýmettik jobalardy iske asyrýǵa nıetti Taraz qalasynan túlep ushqan azamattarǵa ákimdik tarapynan qoldaý kórsetiletindigin jetkizdi. Jetistikke jetken árbir túlek altyn uıa mektebimen tyǵyz baılanys ornatyp, keıingi jastarmen ómirlik tájirıbesimen bólisip, urpaqtar sabaqtastyǵyn jalǵaý kerektigin aıtty.
Taraz qalasynda mesenattardyń bastamasymen ıgi ister atqarylyp keledi. Bıyl da jomart túlekterdiń bastamasymen «Oqýshylar saraıy», «Anaǵa taǵzym», «Ústel tennısi ortalyǵy», «О́ner úıi» sııaqty aýqymdy jumystar bastalyp ketti. Jobanyń jalpy quny 5,4 mıllıard teńgeni quraıdy.
Sondaı-aq, «Asarlatyp úı salý» jobasy aıasynda 15 úı salynady. Osylaısha, týǵan topyraqtan qýat alyp ósken árbir áýlıeatalyq túlek egemen elimizdiń damýyna óz úlesin qosýda.
Jıynda Taraz qalalyq máslıhatynyń hatshysy Batyrbek Qulekeev pen eńbek ardageri Qaırat Shotbaqov jáne ózge de tanymal túlekter sóz alyp, qanatqaqty jobanyń jastarǵa úlgi bolarlyq mán-maǵynasy týraly aıtty. Qazaqstan Respýblıkasy Parlamenti májilisiniń depýtaty Gúldara Nurymova, Almaty qalasyndaǵy prezıdenttik is-basqarý ortalyq klınıkalyq aýrýhanasy neırohırýrgııa bóliminiń meńgerýshisi Marat Sarshaev sharaǵa onlaın rejımde qatysyp, quttyqtaý sózderin jetkizdi. Al jeke kásipker Álimbek Jumabaev, bokstan Olımpıada oıyndarynyń jeńimpazy, Vel Barker Kýbogynyń ıegeri (Afına-2004) Baqtııar Artaev, aqyn Ǵaını Álimbekqyzy, ánshi Álisher Karımov, Fransııanyń Vıljýıf qalasy Gýstava Rýsı ınstıtýtynyń doktoranty Karına Mataeva, bloger Eldos Qadyrhanov, ázilkesh Arman Janalıevter túlekterdi ózi bilim alǵan mektebine demeýshilik etip, óńirdiń damýyna meılinshe qoldaý kórsetýge shaqyrdy.
San salada el damýyna súbeli úles qosyp júrgen tanymal tarazdyqtar mundaı kezdesýge shaqyrtý alǵandaryna qýanyp, túlekterdiń basyn qosqany úshin alǵys bildirdi. Kezdesý barysynda ıdeıalary men usynystaryn aıtty.
Tárbıelik mańyzy bar jıynǵa 500-den asa oqýshy onlaın rejımde qosyldy. Kezdesý sońynda belsendi túlekter qala ákiminiń Alǵys hatymen marapattaldy. Endi mundaı bas qosý keminde jylyna bir ret ótetin bolady.
Aıta keterlik jaıt, Táýelsizdik jyldary Taraz qalasynda 70 myńnan astam túlek mektep bitirgen. Búginde túlekterdiń basyn qosý maqsatynda jambyl-tylek.kz saıty iske qosylyp, oǵan 14 myńnan astam tarazdyq túlek tirkelgen.
