Jyl saıyn 23 sáýirde ótkiziletin aksııa qashyqtan oqýǵa ótýine baılanysty sáýirdiń 15-16-sy kúnderi ótti. Adamdardy jappaı jınamaý maqsatynda kezeń-kezeńge bólinip, araqashyqtyq pen sanıtarlyq talaptar saqtala otyryp uıymdastyryldy. Aksııaǵa qatysýshylar ózderine jerebe arqyly túsken qupııa dosynyń qalaýly janry boıynsha kitap satyp alyp, oǵan izgi tilekter jaýdyrdy.
– Synyptastarynyń talǵamyn jaqynyraq tanytý jáne saqtyq sharalaryn saqtaý maqsatynda bıyl qatysýshy oqýshylar óz synyptastaryna kitap syılady. Al ustazdar áriptesterinen qupııa dosty izdedi, – deıdi aksııany uıymdastyrýshy, mektep aǵa kitaphanashysy Janar Bahıtova.
Kitap oqýdy nasıhattaý sharasyna tórtinshi ret qatysyp turǵan 11-synyp oqýshysy Jansultan Búrkitbaı aksııany asyǵa kútkenin aıtady.
– Bul sharaǵa aksııa bastalǵaly beri qatysyp kelemin. О́te qyzyqty shara. Ár jyly kimge tústim eken, qandaı kitap syılar eken dep júresiń. Osy joly maǵan Abaıdyń «45 qarasózin» qoıyn kitapsha túrinde syılady. Al men Iýlııa Lımniń «Spısok» kitabyn syıladym. Saqtyq sharalaryn saqtaýǵa týra keldi, sol úshin de mektep aýlasynda jınala almadyq. Shyny kerek, sol bir atmosfera ózime de qatty unaıtyn. Aksııadan keıin de kitap syılaý meniń súıikti ádetime aınaldy, – deıdi ózin-ózi basqarý uıymynyń prezıdenti.
«Kitap álemdi baǵyndyrady» aksııasy – Nazarbaev zııatkerlik mektebinde 2017 jyldan beri uıymdastyrylyp keledi. Jalpy esep boıynsha aksııaǵa 2017 jyldan beri 3 myńǵa jýyq adam qatysty.
Mańǵystaý oblysy
