Qasym-Jomart Toqaev baýyrlas eki el halyqtarynyń múddesi úshin Qazaqstan Túrikmenstanmen kópjaqty baılanystardy odan ári damytýǵa daıyn ekenin málimdedi.
Gýrbangýly Berdimuhamedovtiń pikirinshe, Qazaqstan Túrikmenstannyń Ortalyq Azııadaǵy negizgi seriktesi.
Prezıdentter ózara saýda kólemin arttyrý, ónerkásip, aýyl sharýashylyǵy, energetıka, kólik jáne logıstıka salalaryndaǵy jobalardy júzege asyrý maqsatymen Qazaqstan men Túrikmenstannyń kúsh biriktirýge daıyn ekenin rastady.
Taraptar eki el arasyndaǵy yntymaqtastyqqa qosymsha qarqyn berý úshin bıyl Úkimetaralyq komıssııa otyrysyn ótkizýge kelisti.
Qazaqstan Prezıdenti ortaq kelisim bolǵan jaǵdaıda, kezekti Ortalyq Azııa elderi basshylarynyń konsýltatıvtik kezdesýin Túrikmenstan astanasynda ótkizýdi qoldaıtynyn jetkizdi. Budan bólek Qasym-Jomart Toqaev túrikmen eliniń basshysyna Qazaqstannyń Túrkitildes memleketterdiń yntymaqtastyǵy keńesinde kótergen bastamalaryn qoldaǵany, sondaı-aq, Túrikmenstannyń Azııadaǵy ózara yqpaldastyq jáne senim sharalary keńesine baqylaýshy retinde kirgeni úshin rızashylyǵyn bildirdi.
Gýrbangýly Berdimuhamedov Qasym-Jomart Toqaevty ekijaqty yntymaqtastyqtyń ózekti máselelerin talqylap, mańyzdy kelisimderge qol qoıý úshin Túrikmenstanǵa saparmen kelýge shaqyrdy.
Qazaqstan Prezıdenti túrikmenstandyq áriptesine ákesiniń qaıtys bolýyna baılanysty kóńil aıtty.
