Degenmen, ózi týǵan jerdi áıgili Kenen Ázirbaevtyń «Qordaıdyń taýy da altyn, tasy da altyn» dep jyrǵa qosýy tegin emes. Qazaqtyń qarapaıym árbir jeri qoınyna qazyna saqtaǵan qasıetti alqap. Sol qasıet Táýelsizdik zamanynda el ıgiligine bastap otyr.
Jýyrda ǵana Noǵaıbaı aýyldyq okrýginde altyn óndiretin kásiporyn qurylysy resmı túrde iske qosyldy. О́ndiris bir jaǵynan básekelestik bási bolsa, ekinshi jaǵynan qyrýar tabystyń kózi de. Atalǵan bastamaǵa «MONTERRA QAZAQSTAN» JShS qoldaý kórsetýde. Áýeli Noǵaıbaı aýylynda atalǵan seriktestiktiń jańa taý-ken metallýrgııa kombınatynyń qurylysy bastalyp, onyń ishine ýaqyt kapsýlasy salynǵan bolatyn. Sonymen qatar tarıhı sharaǵa oblys ákimi Berdibek Saparbaevpen birge elimizdiń Indýstrııa jáne ınfraqurylymdyq damý mınıstri Beıbit Atamqulov, «MONTERRA GROUP AG» basqarma tóraǵasy Krıstıan Graf fon Strahvıs jáne Germanııa Federatıvtik Respýblıkasynyń elimizdegi Tótenshe jáne ókiletti elshisi Tılo Klınner qatysqanyn da aıta ketý kerek.
Búginde altyn shyqqan aımaqty ýaqyt talabyna saı damytý jumystary júrgizilýde. Qazirgi kezde óndiris ornynan 6,4 tonna taza altyn qory anyqtaldy. Biraq ınvestorlar men mamandardyń aıtýynsha, qorshaǵan ortaǵa edáýir zııan keltirýine baılanysty olar sıanıdti qoldaný arqyly baǵaly metaldardy óndirýden bas tartqan. Endi ýaqyt talabyna saı tehnologııalardy anyqtaý jáne sonymen jumys isteý mańyzdy bolyp tur. Krıstıan Graf fon Strahvıstiń aıtýynsha, bes jyldan beri ınvestorlar atalǵan jobany júzege asyrý jolynda jumys istep keledi eken. Sondaı-aq ol daıyn qundy metaldy áýeli Qazaqstan Ulttyq banki satyp alýǵa quqyly ekenin aıtty. Munda endi 585 synamaly altyn emes, taza altyn óndiriledi dep kútilýde. Qordaı aýdanynda altyn óndirý jobasy tolyǵymen iske asqan jaǵdaıda, bul oblys ekonomıkasynyń ósýine de serpin beredi deýge bolady. Sonymen qatar jarqyn joba tolyǵymen júzege asqan jaǵdaıda 2 800 jumys orny qurylady dep kútilýde. Bul jobanyń jalpy quny 1,6 mlrd eýroǵa teń. Jalpy, atalǵan joba úsh kezeń boıynsha júzege asyrylady. Alǵashynda 295 mlrd teńge ınvestısııalanyp, nátıjesinde jospar boıynsha bir tonna altyn óndirilýi tıis. Budan keıin 235 jáne 310 mlrd teńgeniń jumystary atqarylatyn bolady. Al altyn óndirý kombınaty tolyq qýatynda jumys istegende baryp 10 myń kılogramǵa deıin qundy metall óndiriledi. Osy ýaqytqa deıin ınvestorlar bul maqsatqa 6 mlrd teńge salypty. Endi geologııalyq barlaý jumystaryna da jiti mán berilýde. Búginde jeti ýchaskede geologııalyq-barlaý jumystary aıaqtaldy. Sonymen qatar tórt bólimshede jumys qarqyndy júrgizilýde. Ken óndirý tereńdigi shamamen 350 metrge deıin jetedi.
«MONTERRA QAZAQSTAN» JShS bas dırektory Merýert Danbaeva aldaǵy ýaqytta munda vahtalyq qalashyqtyń da salynatynyn aıtty. Jalpy, bir sózben aıtqanda, Qordaı aýdany aýmaǵynda altyn óndirý úshin barlyq múmkindik qarastyrylady.
Bolashaqta Qordaı aýdany ken óndirý isimen de elge tanylatyn bolady. Alaıda, altyn óndirý isinde maman daıyndaý kúrdeli máseleniń biri. Qazirgi kezde jergilikti jastardy Germanııadaǵy joǵary oqý oryndaryna ınjener mamandyǵyn ıgerý úshin oqýǵa jiberý kerektigi aıtylýda. Sonymen qatar tıisti mamandardy jergilikti kolledjderdiń bazasynda daıyndaý da mańyzdy bolyp otyr. Jergilikti jerde maman daıyndaý isiniń de qalaı júzege asatynyn ýaqyt kórsetedi.
Jambyl oblysy,
Qordaı aýdany
