Tashkentte erler saıysynda Abylaı Áýelhanov (55 kılo), Alekseı Drozdov (61 kılo), Aqmolda Saıramkez (67 kılo), Saıhan Taısýev (73 kılo) jáne Rahat Bekbolat (102 kılo) kúsh synassa, áıelder arasynda Gúlnur Ybyraı (64 kılo) men Aısamal Sansyzbaeva (+87 kılo) óner kórsetedi. Bul sportshylardyń deni jasóspirimder men jastar býyny arasyndaǵy jarystarda oljaǵa kenelip júrgenin jankúıerler jaqsy biledi. Máselen, Abylaı byltyr Perýdiń astanasy – Lımada uıymdastyrylǵan Álem kýbogynda top jarsa, bıyl eresekterdiń el birinshiliginde bas júldeni oljalady. Sońǵy básekede ol álem chempıonatynyń eki dúrkin kúmis júldegeri, Azııa chempıony, Dúnıejúzilik Ýnıversıadanyń qola júldegeri Arlı Chonteıdiń ózin shań qaptyryp ketti. Bul jarystyń ekeýi de onlaın formatta ótkenin esterińizge sala keteıik.
Byltyr Perýde Rahat Álem kýbogynyń ıegeri atanyp qana qoımaı, álemdik rekordty da jańartty. 2019 jyly ol jasóspirimderdiń álem jáne Azııa birinshilikterinde altyn tuǵyrǵa kóterildi. Sol jarystardyń birinde soǵan deıin Ilıa Ilın kórsetken nátıjeden asyp túsken qazaqtyń nar tulǵaly uly kópshiliktiń qoshemetine bólengeni de esimizde. Ústimizdegi jyldyń sáýir aıynda Tashkentte ótken eresekterdiń Azııa chempıonatynda da Rahat aldyna jan salmady. Sol sekildi túrli baıraqty básekelerde Alekseı, Aqmolda, Saıhan jáne Gúlnur men Aısamal syndy ul-qyzdarymyzdyń da qol jetkizgen tabystary qomaqty.
– Men ulttyq quramanyń bas bapkeri retinde jastardyń da ár qadamyn jiti qadaǵalap otyramyn. О́ıtkeni keleshekte sol saıypqyrandar qazirgi myqtylardyń ornyn basady. Sol sebepti de ár kez olardyń qarym-qabiletin baıqap, shama-sharqyn shamalap otyrýym qajet. Bir aıta keterligi, qazirdiń ózinde keıbir jalyndy jastar saqa sportshylardy san soqtyryp júr. Máselen, Tashkentke attanǵaly otyrǵan ul-qyzdarymyzdyń birazy sáýirde ótken el chempıonatynda myqtylardy joldarynan yǵystyryp, bas júldeni enshiledi. Sondaı sátterdiń kýási bolǵanymyzda kóńilimiz marqaıyp qaldy. Bizdi keń-baıtaq respýblıkamyzdyń ár qıyrynda daryndy ziltemirshilerdiń qalyń shoǵyry ósip kele jatqany qýantty. Buıyrtsa, sheberlikteri shyńdala kele, osy órenderimiz eresekter arasyndaǵy álemdik deńgeıdegi dodalarda da daralanatynyna esh kúmánim joq, – deıdi bul kúnderi Qazaqstannyń ulttyq quramasynyń tizginin ustap otyrǵan kezindegi tanymal aýyr atlet Baqyt Ahmetov.
Jastar arasyndaǵy álem birinshiligine Qazaqstan quramasy úzbeı qatysyp keledi. Bir aıta keterligi, bizdiń komanda ár kez sanǵa emes, sapaǵa júginýde jáne de bul taktıka óz jemisin berip keledi. Oǵan dálel, álemniń ár qıyrynda ótetin jarystarǵa Qazaq elinen sanaýly ǵana ziltemirshiler attanǵanyna qaramastan, solardyń deni jeńis tuǵyryna kóterilip júr. Nátıjesinde, jalpykomandalyq esepte jerlesterimiz únemi úzdikter qatarynan túsken emes. Máselen, 2019 jyly Fıdjı aralynda bes sportshymyz óner kórsetip, solardyń úsheýi oljaǵa keneldi. Karına Quzǵanbaeva (81 kılo) men Darııa Ahmerova (87 kılo) altynnan alqa taqsa, Artem Antropov (97 kılo) kúmis medaldy moınyna ildi. Tarqatyp aıtsaq, Quzǵanbaeva óziniń basty qarsylasy, Ońtústik Koreıanyń ókili Jang Hıenjýdan úsh kılo ozsa, Ahmerova reseılik Darııa Rıazanovadan toǵyz kılo artyq salmaqty eńserdi. Sol sekildi Evgenıı Lomanov (81 kılo) pen Nurǵısa Ádiletulynyń da (89 kılo) óneri jaqsy áser qaldyrdy. Olar jeńis tuǵyryna kóterile almasa da, úzdik bestiktiń qatarynan kórindi.
Fıdjıdegi álem birinshiliginiń jalpykomandalyq esebinde Qytaı quramasy kósh bastady. Aspanasty eliniń ókilderi bas júldeniń tórteýin oljalady. Qazaqstannyń órenderi ekinshi oryndy ıelendi. Bizdiń ziltemirshilerdiń qorjyny 2 altyn jáne 1 kúmis medalmen tolyqty. Úshinshi satyǵa AQSh-tyń sportshylary taban tiredi. Amerıkalyqtar 2 altyn men 2 qola júldeni ıemdendi. Sondaı-aq qos altynnan enshilegen Mysyr men О́zbekstan quramalary ozyq bes komandanyń sanatyna qosyldy.
