2020 jylǵy sáýirde Sádýaqasov Densaýlyq saqtaý mınıstrliginen Qazaqstan óńirlerine dárigerlerdiń jappaı vırýs juqtyrý sebepterin zertteýge jiberilgen. Ol sotta Almaty Ortalyq klınıkalyq aýrýhanasynda kórgenderin aıtty.
«Meniń tujyrymdarymda basty sebepterdiń biri jergilikti bılik pen aýmaqtyq ókilettik áreketteriniń sáıkes kelmeýi. Esh kelisimsiz juqpaly aýrýlar aýrýhanasyn ornalastyrdy. Onda olardy oqshaýlamaı tek bólip qoıǵany anyqtaldy. Bul birinshi jáne basty sebepterdiń biri.
Ekinshisi, aýrýhananyń ózi. Men barlyq bólimderdi kórdim. Olar mundaı rejımge daıyn emes edi. Ol kezeńde úsh-tórt blok boldy, bes qabatta úsh sanıtaızer ornatylǵan. Árıne, dárigerler jeke qorǵanys quraldarynda júrdi, biraq ony sheshý jáne kııý, joıý erejeleri buzyldy», dedi Sádýaqasov sotqa.
Aıta keteıik, prokýrorlar Sháripti dárigerlerdiń jappaı vırýs juqtyrýyna kináli dep sanaıdy. О́ıtkeni ol qorǵanys quraldarymen ýaqtyly qamtamasyz etpegen. Bul aıyptaý boıynsha ol eki myń medısına qyzmetkeriniń koronavırýs juqtyrýyna sebep bolǵan.
Sol kezeńde dárigerlerdiń standartty qorǵanys quraldaryna maska, kózildirik, qolǵap, kıim, aıaq kıim kirgen. Sádýaqasovtyń aıtýynsha, dárigerler vırýstyń teri arqyly beriletinin bilmegen.
«Men óz tájirıbemde ınfeksııa negizinen shyryshty qabattar arqyly ótetinin túsindim, maska birinshi kezekte qorǵaıdy jáne kózildirik. Eger adam kózin ustasa, ol qazirdiń ózinde juqtyrýy múmkin. Vırýstyń ózi jeldetý júıesi arqyly júretin qyzylsha sııaqty ushpa emes. Biraq eger araqashyqtyqty saqtamasańyz onda juqtyrý yqtımaldyǵy joǵary», dep túsindirdi ol.
Sondaı-aq Sádýaqasov aýrýhanadaǵy baqylaý kameralaryndaǵy beınejazbalardy qaıta qarap shyqqanyn aıtty.
«Biz sot tergeýinde Sháriptiń aıyptaýy boıynsha qorǵanys quraldarynań jetispeýshiligi eki myń dárigerdiń jappaı vırýs juqtyrýyna ákeldi dep málimdeme jasaǵandyqtan, ony anyqtaýymyz kerek. Ol úshin epıdemıolog maman retinde sizdiń pikirińiz mańyzdy», dedi sýdıa Qanat Dúısembıev.
«Qurmetti sot, búginde medısına qyzmetkerleri ınfeksııa juqtyryp jatyr. Árıne, jappaı emes, biraq Nur-Sultan qalasynda ınfeksııanyń deńgeıi óte joǵary. 50 paıyzdan asa qyzmetker ınfeksııany jumysta juqtyrmaǵanyn aıtady. Biraq qorǵanys quraly jetkilikti bolǵan jaǵdaıda da juqtyrý múmkindigi bar», dep jaýap berdi Nurqan Sádýaqasov.
Aıta keteıik, Berik Shárip medısına qyzmetkerleriniń 2020 jyldyń sáýir-mamyrynda jappaı koronavırýs juqtyrýyna kináli jáne atys qarýyn zańsyz saqtady dep aıyptalǵan edi.
