Bilim • 24 Mamyr, 2021

Qostanaıda ınklıýzıvti bilim berý ortalyǵy ashyldy

24 mamyrda Qostanaı qalasynda №27 jalpy bilim beretin mektep bazasynda ınklıýzıvti bilim berýdiń jańa resýrstyq ortalyǵy ashyldy. Bul Resýrstyq ortalyq erekshe bilim berý qajettilikteri bar balalardy jalpy bilim beretin mektepterge tıimdi beıimdelýi úshin jaǵdaı jasaýǵa múmkindik beredi, dep habarlaıdy Egemen.kz

Aıym DÁÝIT

Resýrstyq ortalyq Qostanaı oblysynyń bilim basqarmasymen birlese otyryp, «Samruk-Kazyna Trust» áleýmettik jobalardy damytý qorynyń qoldaýymen «Dara» jeke qorynyń bastamasy aıasynda boı kóterdi.

Qostanaı oblysy bilim basqarmasynyń derekteri boıynsha qalada erekshe bilim alýǵa qajettiligi bar 2200-den astam bala turady, onyń ishinde 471 bala qala mektepterinde oqıdy.

«Árıne, «erekshe» balalar mektep pen oqytýshylar quramy tarapynan erekshe jáne jan-jaqty kózqarasty talap etedi. Atap aıtqanda, ádistemelik, uıymdastyrýshylyq jáne aqparattyq qoldaý, qorshaǵan ortany beıimdeý, jeke bilim berý baǵyttaryn qurý, al keıbir jaǵdaılarda arnaıy muǵalimderdiń qoldaýy qajet. Sondyqtan bul joldaǵy mańyzdy qadam – resýrstyq ortalyqtardy ashý», deıdi «Dara» JQ ókili Maral Sheshembekova.

Jalpy bilim beretin mektepterge baratyn erekshe qajettilikteri bar balalar kóbinese mamandardyń qoldaýyna, ýaqytyly demalys pen relaksasııaǵa muqtaj. Atalǵan máselelerdiń barlyǵy resýrstyq ortalyqtardy – psıholog, logoped, defektolog jáne basqa muǵalimder balalarmen aınalysatyn keńistikti qurý kezinde eskeriledi.

Munda damý erekshelikteri bar balalarmen jumys isteıtin muǵalimder de, ata-analar da keńes ala alady. Sondaı-aq resýrstyq ortalyqta úıde oqıtyn balalardy áleýmettendirý boıynsha jumystar júrgiziledi.

«Ár alýan – biraq teń» jobasynyń arqasynda ınklıýzıvti bilim berý júıesi keńeıip keledi. Tek sońǵy 1,5 aıdyń ishinde biz Jambyl oblysynda PPTK jáne RO fılıaldaryn, Arqalyq pen Petropavlda 2 RO ashtyq. Al búgin kezekti ortalyqty osynda ashqaly jatyrmyz. Sonymen qatar jýyrda Túrkistan oblysynda da PPTK-ti iske qosamyz. Barlyǵy 14 PPTK jáne 16 ınklıýzıvti bilim berý resýrstyq ortalyǵy ashyldy», dep atap ótti «Samruk-Kazyna Trust» qorynyń resmı ókili Mıras Irgebaev.

Inklıýzıvti bilim berýdiń resýrstyq ortalyǵynyń ashylýy – bul ınklıýzıvti bilim berýdi qoldaýdyń resýrstyq kabınetteriniń jelisin keńeıtý boıynsha bilim men ǵylymdy damytýdyń 2020-2025 jyldarǵa arnalǵan memlekettik baǵdarlamasyn júzege asyrý. Búgingi tańda Qostanaı oblysynda ınklıýzıvti bilim berýdiń 1 resýrstyq ortalyǵy jáne ınklıýzıvti bilim berýdi qoldaýdyń 3 kabıneti jumys isteıdi.