Atap aıtqanda, «qyzyl» syzyq talabyn saqtamaǵan nysandardy buzý boıynsha tıisti basshylarǵa naqty tapsyrma júktegen edi. Búginde berilgen tapsyrmanyń oryndalý qarqyny qandaı? Tıisti mekemeler aıtylǵan synnan qorytyndy shyǵardy ma?
Oblystyq sáýlet jáne qala qurylysy basqarmasynyń basshysy Arman Ábdeshovtiń aıtýynsha, ótken jyly oblys ákiminiń tapsyrmasy boıynsha kommersııalyq kásiporyndar qurylysynyń zańdylyǵyna tekserýler júrgizilgen eken. Tekserý barysynda barlyǵy 123 nysannyń «qyzyl» syzyq talabyn buzǵandyǵy anyqtalyp, búginge deıin 85 nysan súrilgen.
Sondaı-aq, atalǵan basqarma basshysy qalǵan 38 nysanǵa qatysty aýdandyq ákimdikter tıisti shara qoldanbaı otyrǵanyn jetkizdi. Aǵymdaǵy jyldyń basynan beri «qyzyl» syzyqtan asqan taǵy 80 nysan, odan bólek qurylys salýdy uıymdastyrý jáne ruqsat berý rásimderinen ótý jáne paıdalaný qaǵıdasyna saı qujattary rásimdelmegen 16 zańsyz qurylys anyqtalǵan.
Bul oraıda, Berdibek Saparbaev aýdan ákimderi qurylys normalary men erejelerin buzýdy joıý boıynsha naqty sharalar qabyldaýǵa quzyrsyz ekenin aıtty.
«Qyzyl» syzyqqa qatysty másele birinshi ret talqylanyp otyrǵan joq. Zańsyz salynǵan nysandardy buzyp jatqanymyzben, myna jaqtan taǵy da zańsyz jańa nysandar boı kóterýde. Demek, jaýapty organdar men ákimdikter birlesip jumys isteı almaı otyr. Bári jaýapkershilikti bir-birine ysyra salýǵa daıyn. Resmı hattar joldap qoıyp, jaýabyn kútip otyrýǵa úırengensizder. Al, naqty jumysty bastaýǵa eshkim asyǵar emes. Bul bıýrokratııa qashan aıaqtalady?», dedi ákim.
Osy oraıda Berdibek Saparbaev qurylys salasyndaǵy zańsyzdyqtardy qysqa merzimde joıý boıynsha arnaıy is-sharalar kestesin ázirleýdi tapsyryp, Taraz qalasy men aýdan ákimdikteri salynyp jatqan nysandardyń ıelerinde tıisti ruqsat qujattarynyń bar-joqtyǵyn zerdelep, der kezinde qajetti sharalardy qabyldaýy tıis ekenin jetkizdi.
Sonymen qatar, memlekettik sáýlet-qurylys baqylaý basqarmasynyń basshysyna da qurylys jumystarynyń sapasyn qadaǵalaýdy tapsyrdy.
