«Elbasy bul ıdeıany jáne osyǵan deıin kóterilgen ózge de bastamalardy qoldaǵan joq. Oǵan eskertkish ornatý, sáýlet nysanynyń ataýyn ózgertýmen baılanysty mundaı «syılyqtar», ásirese bul «syılyqtar» jergilikti sheneýnikter uıymdastyrsa múldem unamaıdy. Nursultan Ábishuly mundaı kóńil aýdarýlardyń qajet emestigin san márte málimdegen bolatyn. Keıde keıbir adamdar ádeıi aqparattyq shý týdyrǵysy keletindeı áser qaldyrady. Tarıhta ol óz atyn jańa jobaǵa berýge kelisken bir ǵana jaǵdaı boldy. Bul – ýnıversıtet pen zııatkerlik mektepter», dedi Elbasynyń baspasóz hatshysy.
Sonymen qatar ol Astana kúni, Tuńǵysh Prezıdent kúni jáne ózge de ataýly datalar eń aldymen adamdar, elimizdiń azamattary úshin meıram ekenine basa nazar aýdartty.
«Bıyl Qazaqstan Táýelsizdiginiń 30 jyldyq mereıtoıyn atap ótedi jáne de barlyǵymyz úshin basty syılyq eskertkishter nemese ataý ózgertý emes, halqymyzdyń birligin, turaqtylyǵyn, ál-aýqaty men gúldenýin saqtaýǵa baǵyttalǵan júıeli is-sharalardy sapaly júzege asyrý bolýy tıis. Nursultan Nazarbaev atap ótkendeı, onyń eńbeginiń eń úzdik eskertkishi – bul jarqyn bolashaqqa umtylatyn, ilgeri oılaı biletin jastar, bul zamanaýı elordasymen, óz Otanyn shynaıy súıetin azamattarymen gúldenip kele jatqan Qazaqstan», dedi Aıdos Úkibaı.
Eske sala keteıik, TÚRIKSOI-dyń Bas hatshysy Bılal Chakydjı «Túrkistan – Túrki áleminiń rýhanı astanasy: áriptestik ıntegrasııasy men keleshegi» atty halyqaralyq onlaın-konferensııa barysynda Túrkistanda Elbasy N.Nazarbaevqa eskertkish ornatý týraly bastama jasaǵan edi.
