Birinshi vıse-premer birqatar ınfraqurylymdyq nysandy aralady. Arqalyq áýejaıyn qalpyna keltirý jobasymen tanysty. Búginde áýejaı qurylysynyń 80 paıyzy aıaqtaldy. Jańa nysannyń jalpy aýdany shamamen 3 myń sharshy metr bolady. «Bul nysannyń mańyzy erekshe. Arqalyq qalasynda jańadan boı kóterip jatqan iri ǵımarattardyń biri osy bolmaq. Sondyqtan qurylys sapasy óte joǵary deńgeıde bolýǵa tıis. Halyq bul nysandy kópten kútti. Áýejaı Memleket basshysynyń tikeleı tapsyrmasymen salynyp jatyr. Sondyqtan jumysty belgilengen merzimde ǵana emes, joǵary sapamen aıaqtaý qajet. Eń bastysy, sapa. Áýejaı termınaly Arqalyq qalasynyń kórkin ashatyn zamanaýı nysan bolýy kerek. Kólemi shaǵyn bolǵanymen, sáýletti ári jolaýshyǵa jaıly bolýǵa tıis. Sondyqtan sapa máselesin qatań baqylaýǵa alý qajet. Arqalyq turǵyndary úshin áýe qatynasy qoljetimdi bolýy kerek. Ásirese alǵashqy kezeńde reısterdi sýbsıdııalaý máselesine erekshe kóńil bólgen jón. Biraq bılet quny temirjol tasymalynan tym tómen bolmaýy qajet. Bul jerde ekonomıkalyq negizdemeniń saqtalýy mańyzdy. Usynystardyń bári jan-jaqty qaralyp, tıisti mınıstrliktermen birlesip sheshim qabyldaý qajet», dedi Premer-mınıstrdiń birinshi orynbasary.
Áýejaı qurylysyn 15 shildege deıin aıaqtaý josparlanyp otyr. Nurlybek Nálibaev áýejaı termınalyn qalpyna keltirý óńirdiń áleýmettik-ekonomıkalyq damýyna tyń serpin beretin mańyzdy joba ekenin atap ótip, barlyq jumysty sapaly ári ýaqtyly aıaqtaýdy tapsyrdy.
Vıse-premer Tobyl qalasyndaǵy «Astana» shaǵyn aýdanynyń qurylys alańynda boldy. Munda 23 kópqabatty turǵyn úı salynyp, 1035 otbasy baspanamen qamtylmaq.
Úkimet basshysynyń birinshi orynbasary Qostanaıdaǵy «KIA Qazaqstan» avtomobıl zaýytynyń jumysymen de tanysty. Jylyna 70 myń avtokólik shyǵara alatyn kásiporyn 310 mln dollar kólemindegi ınvestısııa esebinen iske qosylǵan.
Zaýyt jumysy tolyq avtomattandyrylǵan, óndiris negizinen robottandyrylǵan júıede jumys isteıdi. Búginde munda 800-ge jýyq adam eńbek etedi. Jyl basynan beri shamamen 7 myń avtokólik shyǵarǵan kásiporyn ishki naryqtaǵy suranysty tolyq qamtamasyz etip otyr. Munyń syrtynda otandyq avtoónerkásiptiń eksporttyq áleýetin arttyrý baǵytynda júıeli jumys júrgizilip jatyr.
Sapar barysynda Nurlybek Nálibaev «Tobyl» kólik-logıstıkalyq kesheniniń qurylysymen tanysty. Jalpy quny 64 mlrd teńgege jýyq iri ınfraqurylymdyq joba óńirdiń tranzıttik áleýetin arttyrýǵa baǵyttalǵan. Joba tolyq iske qosylǵan soń munda 500 jańa jumys orny ashylyp, konteınerlik tasymal kólemi 20%-ǵa deıin ulǵaıady. Jobanyń bastapqy kezeńi aıasynda 2723 metr temirjol jelisi, 26 myń sharshy metr konteıner alańy salyndy. О́ńirdiń tranzıttik múmkindiginiń eselep artýyna jol ashatyn keshenniń qurylysy 2027 jyly aıaqtalady. «Keshen keleshekte Qostanaı oblysynyń tranzıttik jáne logıstıkalyq áleýetin edáýir arttyryp, halyqaralyq júk tasymaly baǵytyndaǵy mańyzdy habtardyń birine aınalmaq. Bul óz kezeginde óńir ekonomıkasynyń damýyna, jańa jumys oryndarynyń qurylýyna oń áser etip, oblystyń ınvestısııalyq tartymdylyǵyn arttyrady», dedi «Tobyl» KLK» JShS dırektory Aıdyn Álimov.
Jumys toby ındýstrııalyq aımaqta ornalasqan «KamLitKZ» zaýytyna bardy. Kásiporyn aýyr júk kólikterine arnalǵan avtobólshekter shyǵarady. Buǵan deıin shoıyn quıý óndirisi iske qosylǵan. Byltyr zaýyt 654 myń tonna ónim óndirip, onyń basym bóligin eksportqa jóneltken.
Vıse-premer aldaǵy ýaqytta óńirde iske asyrylatyn gaz-hımııa kesheni men Aqtóbe – Qostanaı magıstraldyq gaz qubyrynyń qurylysy jónindegi jobalarmen, sonymen qatar «Baıan sulý» fabrıkasynyń «Kondıterlik astana» jobasymen tanysty.
Sapar aıasynda óńirdiń ınvestısııalyq áleýetin arttyrýǵa baǵyttalǵan eki iri joba usynyldy. Aldaǵy ýaqytta Qostanaı oblysynda astyqty tereń óńdeıtin jáne turaqty avıasııalyq otyn (SAF) óndiretin eki birdeı zaýyt salynbaq.
Nurlybek Nálibaev sapar aıasynda Rýdnyı qalasyna baryp, «SSKО́B» aksıonerlik qoǵamynyń qyzmeti men temir rýdasyn óndirý tehnologııasymen, shekemtas óndirý fabrıkasynyń jumysymen tanysty. «SSKО́B» búginde óńirdegi eń iri óndiris oryndarynyń birinen sanalady. Kompanııada 9 myńnan astam adam eńbek etedi.
Sapar qorytyndysynda Premer-mınıstrdiń birinshi orynbasary birqatar naqty tapsyrma berdi. Olardyń qatarynda ınvestısııalyq jobalardy qoldaý jáne eksporttyq áleýetti keńeıtý, ındýstrııalyq aımaq ınfraqurylymyn damytý, «Tobyl» logıstıkalyq keshenin qarjylandyrýdy jedeldetý, aýyl sharýashylyǵy ónimderin tereń óńdeý jobalaryn júzege asyrý, turǵyn úı qurylysyn jedeldetý jáne sapasyn baqylaý, jylytý maýsymyna daıyndyq jumystaryn kúsheıtý máseleleri bar.
Sonymen qatar energetıka, kólik jáne kommýnaldyq ınfraqurylym salalaryndaǵy strategııalyq jobalardy ýaqtyly aıaqtaý mindetteldi.
Qostanaı oblysy
