Qazaqstannyń Reseıdegi elshisi Dáýren Abaev óz sózinde memlekettik rámizderdiń mańyzdylyǵy, ásirese otandastarymyz elden jyraq júrgende kók Týymyz ben Eltańbany baıqasa nemese «Meniń Qazaqstanym» ánuranyn shyrqaǵanda maqtanyshy oıanyp, atamekenmen rýhanı úndestigin sezingen sátterde erekshe kórinetinin aıtty.
«Ádil Qazaqstandy qurý baǵytyn iske asyrý sheńberinde elimizdiń jańa Konstıtýsııasyn qabyldaý – qoǵamda bolyp jatqan jáne ony odan ári demokratııalandyrýǵa baǵyttalǵan tereń ózgeristerdiń kórinisi. Negizgi zań Otanymyzdyń ornyqty damýy úshin berik irgetas qalaıdy, memlekettik ınstıtýttardyń jaýapkershiligin nyǵaıtady jáne konstıtýsııalyq quqyqtyń qazirgi halyqaralyq standarttaryna sáıkes keledi», dedi elshi.
Qazaqstandyqtardy merekemen quttyqtaǵan Toqtar Áýbákirov elimizdiń árbir azamaty memlekettiń osynaý eńseli rámizderin qasterlep, onyń bıik mánine saı bolýy keregin jetkizdi.
«Eger memlekettiń sımvolıkasy ádemi bolsa, demek halyqtyń jany ádemi. Sondyqtan ony odan ári damytyp, memleketimizdi bıik shyńdarǵa kótersin!» dedi Keńes Odaǵynyń batyry.
Is-sharada P.P.Chaıkovskıı atyndaǵy Máskeý memlekettik konservatorııasynyń jáne Gnesın atyndaǵy mýzykalyq ýchılısheniń qazaqstandyq stýdentteriniń Memlekettik ánuranymyzdy oryndaýy kezdesýge erekshe áser berdi. Jıyn aıaǵynda elshilik murajaıyna elimizdiń jańa Konstıtýsııasynyń kitap nusqasy qoıyldy.
