Kezdesý barysynda Qazaqstan men Dúnıejúzilik densaýlyq saqtaý uıymy arasyndaǵy, atap aıtqanda, koronavırýs pandemııasyna qarsy is-qımyl boıynsha yntymaqtastyqty nyǵaıtýdyń perspektıvalary qarastyryldy.
Qasym-Jomart Toqaev Qazaqstannyń Dúnıejúzilik densaýlyq saqtaý uıymymen aradaǵy yqpaldastyqtyń deńgeıin joǵary baǵalady. Sondaı-aq Tedros Adhanom Gebreıesýstiń Dúnıejúzilik densaýlyq saqtaý assambleıasynyń ashylýynda COVID-19 indetine qarsy vaksınalaý jónindegi jahandyq kúsh-jigerdi kúsheıtýge shaqyrǵan sózin qoldady. Dúnıejúzilik densaýlyq saqtaý uıymy Bas dırektorynyń aıtýynsha, qyrkúıek aıyna qaraı jer sharyndaǵy halyqtyń 10 paıyzyna ekpe egilip, jyl sońyna deıin bul kórsetkish 30 paıyzǵa jetýi kerek.
Prezıdent elimizge naqty kórsetken qoldaýy, ıaǵnı pandemııanyń alǵashqy aılarynda qorǵanysh quraldary men medısınalyq jabdyqtardy jetkizip bergeni úshin Dúnıejúzilik densaýlyq saqtaý uıymyna rızashylyq bildirdi.
Qasym-Jomart Toqaev Tedros Adhanom Gebreıesýske Qazaqstanda koronavırýspen kúresý úshin qabyldanyp jatqan sharalar jóninde málimet berdi.
Áńgimelesý barysynda COVID-19 indetine qarsy ekpe egý úderisine basa mán berildi. Prezıdent Dúnıejúzilik densaýlyq saqtaý uıymynyń basshysyna qazaqstandyq QazVac vaksınasynyń klınıkalyq synamalarynyń aldyn ala nátıjeleri týraly aıtty. Otandyq vaksınanyń tıimdilik deńgeıi 96 paıyz. Qazirgi ýaqytta salalyq organdar otandyq vaksınaǵa kelisim alý úshin Dúnıejúzilik densaýlyq saqtaý uıymymen jumys júrgizip jatyr. Tedros Adhanom Gebreıesýs Qasym-Jomart Toqaevtyń pandemııaǵa qarsy kúrestegi eńbegine joǵary baǵa berdi.
– Búginge deıin 2 mıllıon adamǵa vaksına salynǵan eken. Bul óte jaqsy kórsetkish. Kóptegen el mundaı deńgeıge jetken joq. Halyqtyń 55 paıyzyna ekpe salamyz degen maqsattaryńyz qoldaýǵa turarlyq, – dedi Dúnıejúzilik densaýlyq saqtaý uıymynyń basshysy.
Sonymen qatar ol QazVac ekpesiniń ázirlemesin qoldaıtynyn jáne Dúnıejúzilik densaýlyq saqtaý uıymy tótenshe jaǵdaı kezinde paıdalanýǵa bolatyn dári-dármekterdiń tizimine qosý múmkindigin qarastyrýǵa daıyn ekenin aıtty.
Taraptar alǵashqy medısınalyq-sanıtarlyq kómek qyzmetiniń damý perspektıvalaryn, atap aıtqanda, 2018 jyly qabyldanǵan Astana deklarasııasyn ilgeriletý máselesin qozǵady. Osy oraıda Memleket basshysy Qazaqstannyń bastamasy boıynsha ázirlenetin Alǵashqy medısınalyq-sanıtarlyq kómek týraly saıası rezolıýsııany qoldaýǵa shaqyrdy. Atalǵan qujat 2022 jyly ótetin BUU Bas Assambleıasynyń kezekti sessııasynda qabyldanýy múmkin. Rezolıýsııa jobasynda Astana deklarasııasynyń mindetteri men Alǵashqy medısınalyq-sanıtarlyq kómek mehanızmderi qamtylǵan.
Qasym-Jomart Toqaev Tedros Adhanom Gebreıesýsqa «One Health» baǵdarlamasy aıasynda daıyndalǵan Ortalyq Azııanyń áleýetin arttyrý jónindegi Qazaqstannyń pılottyq jobasyn usyndy. Bul joba aýrý men bıoqaýipsizdikti baqylaýdyń óńirlik ortalyǵyn qurýdy maqsat etedi.
Taraptar pandemııanyń syn-qaterlerin eńserý maqsatynda tyǵyz yntymaqtasa jumys isteýdi jalǵastyrýǵa ýaǵdalasty. Memleket basshysy Qazaqstannyń Dúnıejúzilik densaýlyq saqtaý uıymynyń qundylyqtary men maqsattaryn odan ári ilgeriletýge ázir ekenin naqtylady.
