Keles aýdandyq polısııa bólimine jergilikti turǵyn habarlasyp, tez arada kómek kerek bolyp turǵanyn aıtady. Áıeldiń aıtýynsha, onyń 11 jastaǵy qyzy men jeti, bes jáne tórt jastaǵy uldary tańerteńgi ýaqytta úıdiń aýlasynda oınap júrgen. Birshama ýaqyttan keıin qarasa, jaqyn arada balalary kórinbeıdi. Anasy ózi ary-beri izdep, jarty saǵattaı ýaqytyn jumsaıdy. Izdeýden nátıje shyqpaǵannan keıin, polıseılerden járdem suraǵan.
Oqıǵa ornyna birneshe topqa bólingen tártip saqshylary jedel jetti. Jan-jaqty izdestirý jumystaryn júrgizdi. Kýágerlerden surastyrdy, kóshe-kósheni, úılerdi retimen muqııat qarap shyqty. Odan bólek, qaraýsyz qalǵan úıler de tyńǵylyqty tekserildi. Birneshe saǵatqa sozylǵan polıseılerdiń izdestirýi oń nátıje berip, balalar segiz shaqyrym qashyqtyqtaǵy basqa kósheden tabyldy. Osylaısha oınap júrip adasqan búldirshinderdi ıývenaldy polısııa tobynyń ınspektory Toılybaı Qoshtaev aman tapty. Tártip saqshylary balalardyń as-sýyn berip, jaǵdaıy jaqsy ekenine kóz jetkizip, ata-analaryna túsindirý jumystaryn júrgizdi. Balaqaılardy úılerine qaıtardy.
