Elbasynyń tapsyrmasyna sáıkes «Qamqorlyq» bastamasy sheńberinde eki jyl ishinde Qazaqstannyń 8 óńirinde aýtızmi jáne basqa da mentaldi aýytqýlary bar balalarǵa arnalǵan ońaltý ortalyqtaryn ashý kózdelgen. Onda 18 jasqa deıingi balalardyń kúndizgi kezeńde bolýy, olardyń damýy úshin jaǵdaılar jáne Otbasyn qoldaý qyzmeti kómek kórsetedi. Ortalyqtarda dáleldengen álemdik praktıkalar negizinde balalardyń áleýmettik beıimdelýi men ómirlik daǵdylaryn damytý úshin sabaqtar ótkiziletin bolady. Budan basqa, balalardy múgedektiktiń aldyn alý máselesin sheshý úshin elimizdiń 17 óńirinde perınataldyq ortalyqtar bazasynda erte aldyn alý ortalyqtary boı kóteredi.
Zeınetkerlerge qoldaýdyń júıeli sharalaryn damytýǵa jáne olardy qoǵamǵa beıideýge erekshe nazar aýdaryldy. «Belsendi uzaq ómir» jańa bastamasy respýblıkanyń barlyq óńirinde qolda bar bos alańdarda kommýnaldyq obektilerdiń «Belsendi uzaq ómir súrý» ortalyqtaryn ashý josparlanyp otyr.
Atalǵan ortalyqtarda emdik dene shynyqtyrý, kompıýterlik saýattylyq, shahmat sabaqtary, óskeleń urpaqty, onyń ishinde qamqorlyq mekemelerindegi balalardy qoldaýǵa jáne ultjandy etip tárbıeleýge baǵyttalǵan áleýmettik baǵdarlamalardy iske asyrý barysy pysyqtalyp jatyr. Aıta ketý kerek, ortalyqtarda kúndelikti tamaq qarastyrylǵanymen, ol jerde tura almaıdy.
«Elbasynyń «Qamqorlyq» bastamasy sheńberinde jylyna 21 myń bala úshin ońaltý men kásibı súıemeldeýge qol jetkizý uıymdastyryldy, bul sońǵy onjyldyqta erekshe qajettilikteri bar balalar úshin eń aýqymdy jobalardyń biri», dep atap ótti «Qamqorlyq» bastamasy Qamqorshylyq keńesiniń tóraǵasy Á.Isekeshev.
Bastamalardy Nursultan Nazarbaev Qory Úkimetpen, «Samuryq-Qazyna» UÁQ» AQ jáne óńirlik ákimdikterimen birlese iske asyryp otyr.
Esterińizge sala keteıik, Elbasynyń «Qamqorlyq» bastamasy aıasynda 2020 jyldyń jeltoqsanynda jyl saıyn 5 myń balany qamtıtyn segiz ońaltý ortalyǵy ashyldy. Bıyl bastama sheńberinde Aqmola, Aqtóbe, Almaty, Shyǵys Qazaqstan, Jambyl, Qyzylorda, Mańǵystaý jáne Túrkistan oblystarynda qosymsha 10 ortalyq qurý boıynsha jumystar júrgizilip jatyr.
