Elimizdiń altyn valıýta qory 2,2 mlrd dollarǵa artty

«Altyn valıýta rezervteriniń ulǵaıýy eń aldymen altyn baǵasynyń bir ýnsııa úshin 1769 AQSh dollarynan 1892 AQSh dollaryna deıin qalpyna kelýi aıasynda altyn portfeliniń 1,9 mlrd AQSh dollaryna (nemese 7%-ǵa) ósýi aıasynda boldy. Rezervter quramyndaǵy altynnyń úlesi 67,7%-ǵa jetti. Baǵaly metall baǵasynyń ósýine AQSh MBQ kiristiliginiń tómendeýi jáne AQSh dollary baǵamynyń jahandyq tómendeýi sebep boldy. Erkin konvertasııalanatyn valıýtadaǵy aktıvter 311 mln AQSh dollaryna, onyń ishinde depozıtter men UB shottaryndaǵy qarajattyń esebinen 297 mln AQSh dollaryna ósti», dedi ol.

Jedel túsken málimetter boıynsha, mamyrdyń sońynda Ulttyq qordyń valıýtalyq aktıvteri bir aıda 800 mln AQSh dollaryna ulǵaıyp, 58,5 mlrd AQSh dollaryn qurady.

«О́tken aıda Ulttyq qordyń valıýtalyq aktıvteriniń ósýi valıýtalyq túsimderdiń ulǵaıýyna jáne oń ınvestısııalyq kiriske baılanysty boldy. Mamyrda valıýtalyq túsimder 720 mln AQSh dollaryn qurady. Qorǵa túsetin túsimderdiń eleýli deńgeıi bıylǵy jyly munaı baǵasynyń qalpyna kelýine jáne mamyrdaǵy úlken salyq tólemderiniń kezeńine baılanysty qalyptasty», dedi Moldabekova.

Aksııalar naryǵyndaǵy jalǵasyn tapqan oń úrdiske, oblıgasııalar men altyn baǵasynyń qalpyna kelýge baılanysty Ulttyq qordyń ınvestısııalyq kirisi mamyrda shamamen 660 mln AQSh dollaryn nemese 1,15%-dy qurady.

Sonymen qatar mamyrda 251 mlrd teńge kóleminde kepildik berilgen jáne nysanaly transfertterdi bólý úshin Ulttyq Bank qordyń valıýtalyq aktıvterin 553 mln AQSh dollary somasyna (balamasy 237 mlrd teńge) satty. Bul rette transfertterdiń bir bóligi teńgedegi shottaǵy qaldyqtar men teńgedegi túsimder esebinen qanaǵattandyryldy.

Sondaı-aq Álııa Moldabekova bolashaq urpaqqa arnalǵan jınaq qory retindegi Ulttyq qordyń rólin nyǵaıtý jónindegi sharalar týraly aıtty.

Qazaqstandyqtardyń bolashaq urpaǵy úshin qarajat jınaqtaýdy qamtamasyz etý Ulttyq qordyń negizgi fýnksııalarynyń biri bolyp tabylady. Ulttyq qordyń qarajatyn qalyptastyrý jáne paıdalaný tujyrymdamasynda qordy "jep qoıý" táýekelderin boldyrmaý maqsatynda IJО́-niń 30%-y deńgeıinde qor kóleminiń tómendemeıtin qaldyǵy belgilendi, ıaǵnı Ulttyq qordyń aktıvteri shekti mánnen tómendegen jaǵdaıda transfertterdiń mólsheri tıisti shamaǵa azaıtylýy tıis.

«Aktıvterdi allokırleý táýekeliniń teńgerimdi deńgeıi kezinde ınvestısııalardan túsetin kiristilik bolashaq urpaq úshin Ulttyq qorda qarajat jınaqtaý kózderiniń biri bolyp tabylady. Men buǵan deıingi suhbattarymnyń birinde aıtyp ótkendeı, Ulttyq bank daǵdarys oryn alǵan 2020 jyly qordyń ınvestısııalanǵan aktıvterin saqtaý jóninde, atap aıtqanda, UQ turaqtandyrý portfelinde «qaýipsizdik kepili» retinde 5 mlrd AQSh dollary mólsherinde tómendemeıtin qaldyqty belgileý jáne aktıvterdiń konservatıvti allokırleýden teńgerimdi allokırleýge kóshý merzimderin uzartý sııaqty sharalar qabyldaǵan, bul qolaısyz ýaqytta aktıvterdiń táýekeldi synyptaryna ınvestısııalaýdy boldyrmaýǵa múmkindik berdi», dedi Ulttyq bank tóraǵasynyń orynbasary.

Qazirgi ýaqytta Ulttyq bank aktıvterdiń teńgerimdi allokırlenýine kóshý jáne aktıvterdiń neǵurlym kiristi synyptarynyń úlesin ulǵaıtý jónindegi jumysty jalǵastyrýda. 2021 jyldyń basynan bastap damýshy elderdiń MBQ-ǵa salynatyn ınvestısııalary 1,3 mlrd AQSh dollaryna jáne ınvestısııalyq deńgeıdegi korporatıvtik oblıgasııalar 500 mln AQSh dollaryna ulǵaıtyldy. Aldyn ala derekter boıynsha osy jyldyń 5 aıynda Ulttyq qor aktıvteriniń kiristiligi 1,64 mlrd AQSh dollaryn nemese 2,84%-dy quraıdy.

Budan basqa, Úkimet Ulttyq bankpen birlesip Ulttyq qordyń jınaqtaý fýnksııasyn qamtamasyz etýge yqpal etetin qosymsha tetikterdi ázirledi. Osylaısha, 2023 jyldan bastap kepildik berilgen transferttiń mólsherin aıqyndaý kontrsıkldyq bıýdjet qaǵıdasyna negizdeletin bolady.