Jańa taraýda kásipkerliktiń qandaı túrin áleýmettik dep atalatyny, bul mártebeni qalaı alýǵa bolatyny jáne mundaı kásipkerlerge memleket qandaı qoldaý kórsetetini sıpattalady.
«Áleýmettik» dep atalý úshin kásiporynda halyqtyń áleýmettik osal toptarynyń ókilderi jumys isteýi kerek. Olardyń qataryna erekshe qajettilikteri bar, múgedek balany tárbıelep otyrǵan ata-analar, zeınetkerler, balalar úıiniń tárbıelenýshileri, kópbalaly otbasylar, qandastar kiredi.
Sonymen qatar kásiporyn olar úshin taýarlar óndire nemese sata alady, sondaı-aq múmkindigi shekteýli adamdarǵa mańyzdy arnaıy qyzmetter kórsetýine bolady.
Áleýmettik kásipkerlerge memleket qoldaý kórsetedi. Senatorlar granttar berý, bankterdegi paıyzdyq mólsherlemeni sýbsıdııalaý, memlekettik múlikti jeńildik sharttarymen jalǵa berý sııaqty sharalardy bekitti. Sondaı-aq qyzmetkerlerdi oqytý jáne biliktiligin arttyrý úshin aqy tólengen jaǵdaıda tabys salyǵyn azaıtý qarastyrylǵan.
Senat tóraǵasy Máýlen Áshimbaev halyqtyń áleýmettik osal toptaryn qoldaý - palatanyń negizgi basymdyqtarynyń biri ekenin atap ótti.
«Memleket basshysy áleýmettik máselelerdi sheshýge, sondaı-aq az qamtylǵan jáne erekshe qajettilikteri bar adamdarǵa qoldaý kórsetýge únemi kóńil bóledi. Bul turǵyda áleýmettik kásipkerlikti damytýdyń mańyzy zor. Bul ózgerister men tolyqtyrýlarǵa bastamashylyq etken jáne daıyndaǵan Senat depýtattary ekenin atap ótken jón. Otandyq zańnamada alǵash ret áleýmettik kásipkerlikke anyqtama berilip otyr», dedi Máýlen Áshimbaev.
