Kezdesýde memlekettik qyzmet salasyn jetildirý jáne memlekettik qyzmet kórsetý sapasyn arttyrý máseleleri talqylandy.
«2019 jyly Memleket basshysy «Halyq únine qulaq asatyn memleket» tujyrymdamasyn iske asyrý boıynsha mindet qoıdy, onda halyqtyń barlyq tilekteri jedel eskeriletin bolady. Sondyqtan búgin memlekettik qyzmet salasynda kóptegen jańashyldyqtar engizilýde. Olardyń barlyǵy memlekettik qyzmetshilerdiń quzyrettiligi men kásibıligin, halyqtyń bılik ınstıtýttaryna senim deńgeıin arttyrýǵa, sybaılas jemqorlyq quqyq buzýshylyqtaryn azaıtýǵa, sondaı-aq memlekettiń jańa ekonomıkalyq saıasatyn iske asyrý jaǵdaıynda memlekettik apparattyń tıimdiligin joǵarylatýǵa baǵyttalǵan», dep atap ótti Anar Jaılǵanova.
Vedomstvo basshysyna oblys ákimdigi janyndaǵy Sıtýasııalyq ortalyq tanystyryldy, ol týyndaǵan qaýip-qaterler men tótenshe jaǵdaılarǵa, sondaı-aq azamattardyń ótinishterine jedel den qoıýǵa arnalǵan.
Sonymen qatar Anar Jaılǵanova «Open Pavlodar» front-ofısiniń jumysymen de tanysty.
«Open Pavlodar» alańynda» «bir tereze» qaǵıdaty boıynsha qaladaǵy turǵyndarǵa qajetti qyzmetter, qarjylyq damý ınstıtýttary, ekinshi deńgeıdegi bankter qyzmet kórsetedi, sondaı-aq sıfrlyq Halyqqa qyzmet kórsetý ortalyǵy jumys isteıdi. Front-ofıstiń zamanaýı tehnıkalyq jabdyqtalýy naqty ýaqyt rejıminde elektrondyq formatta 800-ten astam memlekettik qyzmetti paıdalanýǵa múmkindik beredi.
Jańa ortalyq bazasynda barlyǵy 5 operasııalyq zal jumys isteıdi, qalalyqtarǵa barynsha yńǵaıly bolý úshin kútý zaly men balalar alańy kózdelgen.
Budan basqa, Anar Jaılǵanova Pavlodar qalasynyń Halyqqa qyzmet kórsetý ortalyqtarynyń birinde boldy. Munda 800-den astam memlekettik qyzmet kórsetiledi. Kún saıyn atalǵan ortalyqqa 2000-ǵa jýyq adam keledi.
Agenttik Tóraǵasy azamattarǵa memlekettik qyzmet kórsetý kezinde barynsha qolaıly jaǵdaı jasaý qajettigin atap ótti.
Sondaı-aq memlekettik basqarý akademııasynyń fılıaly bazasynda Anar Jaılǵanova Prezıdenttik Jastar kadrlyq rezerviniń qatysýshylarymen kezdesti. Pavlodar oblysynan barlyǵy 16 adam prezıdenttik Jastar kadrlyq rezervine kirdi, olardyń 6-y jumysqa ornalastyryldy.
«Kadrlyq rezervtiń maqsaty, birinshi kezekte, jastar úshin ashyq áleýmettik lıft qurý. Rezervıster, sizderge memlekettik apparattyń jumys isteý stılin joǵary tıimdilik, memlekettik qyzmet kórsetýdiń joǵary sapasy jáne halyqpen jumys isteı bilý baǵytyna ózgertý boıynsha úmit artylady», dep atap ótti Anar Jaılǵanova.
Fılıaldyń barlyq aýdıtorııalary zamanaýı apparatýramen jabdyqtalǵan: proektorlar, «Smart-kap», ınteraktıvti panelder, Internet jelisine qosylǵan monobloktar, bul tyńdaýshylarǵa sabaq úderisinde de, jobalardy ázirleýde de barlyq resýrstardy paıdalanýǵa múmkindik beredi. Bıyl biliktilikti arttyrý semınarlarynda 681 adam oqytyldy, 124 memlekettik qyzmetshi qaıta daıarlaýdan ótti.
Pavlodar oblysyna jumys saparynyń qorytyndysy boıynsha Agenttik tóraǵasy Anar Jaılǵanova óńirdiń memlekettik qyzmetshilerine «Halyq únine qulaq asatyn memleket» tujyrymdamasyna sáıkes jumys isteýdi, memlekettik qyzmetter kórsetý salasyndaǵy ózekti máselelerge kóbirek kóńil bólýdi jáne azamattardyń ótinishterine ýaqytyly den qoıýdy tapsyrdy.
