«Qaıta óńdelgen plastıkten jasalǵan kartanyń ekologııalyq fýnksııasy da bar. Bank kartasymen jasalǵan árbir tólemniń tranzaksııa somasynan 0,5 paıyz – Eurasian Environmental Fund-qa, taǵy 0,5 paıyzy Eurasian Pay, Apple Pay, Samsung Pay arqyly jasalǵan baılanyssyz tólemder úshin klıentke bonýs retinde jiberiledi. Ekokartamen meılinshe kóbirek tólem jasalǵan saıyn sonshalyqty ekologııalyq baǵdarlamalardy qoldaýǵa qarjy baǵyttalyp otyrady», deıdi Eýrazııalyq bank basqarma tóraǵasy Ivan Belohvostıkov.
Atalǵan eko kartany paıdalaný arqyly árbir qazaqstandyq el ekologııasynyń jaqsarýyna az da bolsa úlesin qosyp otyrmaq. «Jasyl bonýstar» jınaqtalyp otyratyn qor bir aı buryn ǵana «Astana» halyqaralyq qarjy ortalyǵynyń bazasynda qurylǵan.
– Bizdiń mıssııamyz – Qazaqstanda kómirtegi beıtaraptyǵyna qol jetkizý. Biz elge shynaıy kómegin tıgize alatyn túrli baǵdarlamalar men birlesken jobalar jasaý úshin ekobelsendiler men ekologtardy shaqyramyz. Qordyń jumysy ashyq júrgiziledi, – deıdi «Astana» halyqaralyq qarjy ortalyǵy «Jasyl qarjy» qorynyń bas dırektory Aıdar Qazybaev.
Mastercard kompanııasynyń Ortalyq Azııadaǵy bas dırektory Rafal Trepkanyń aıtýynsha, óńirde aldyńǵy qatarly qarjylyq sheshimder iske asýy úshin Mastercard belsendi jumys júrgizip jatyr. Trepka sondaı-aq ekologııalyq kartalardy naryqqa shyǵarý prosesiniń Qazaqstanda da bastalǵanyna qýanysh bildirdi. Al bank kartalary úshin plastık óndirýmen aınalysatyn «Rozan Azııa» kompanııasynyń dırektory Danııar Baıbatshaevtyń aıtýynsha, qaıta óńdelgen plastıkten ekokarta óndirisin jasaý tym qymbatqa túsedi. «Sol sebepti, munda eshkim paıda kórmeıdi. О́ıtkeni qatysýshylar úshin bul kommersııalyq emes, áleýmettik joba. Eń bastysy – osy arqyly ekologııalyq problemalarǵa jáne «jasyl tehnologııalarǵa» el nazaryn aýdara alamyz», deıdi ol.
Ádettegi bank kartalary jumsaq jáne berik materıal bolyp sanalatyn polıvınılhlorıdten jasalady. Reseılik «Ekolaın» kompanııasy dırektorynyń orynbasary Elena Vıshnıakovanyń aıtýynsha, bank kartalaryn ýtılızasııalaý óte kóp qıyndyq týdyrady. Sebebi kartalar tek 200 gradýstyq ystyqta ǵana joıylady. Al mundaı joǵary temperatýra kezinde aýaǵa dıoksın, qorǵasyn, synap, kadmıı, ftalat sııaqty ýly elementter bólinip shyǵady. Sondyqtan sońǵy kezde reseılik mamandar plastıkalyq kartalardy sıfrly kartaǵa aýystyrý týraly usynystar aıta bastady. Osylaısha, qaıta óńdelmeıtin qaldyqtar kólemin azaıtyp, olardy daıyndaýǵa jumsalǵan resýrstardy únemdeımiz, deıdi sarapshylar.
Sońǵy derekter boıynsha Qazaqstanda 30 mlrd tonnadan astam óndiristik jáne tutyný qaldyqtary jınalǵan. Sonyń ishinde plastıkalyq qaldyqtardy qaıta óńdeý jáne joıý máselesi ózekti bolyp tur. 2016 jyly eldegi plastık qaldyq sany 283 387 tonna bolsa, 2018 jyly sonyń 9 myń tonnaǵa jýyǵy ǵana óńdelgen.
Aıtpaqshy, elimizdegi tuńǵysh eko kartany 10 maýsymnan bastap eubank.kz saıtynda onlaın ótinim berý arqyly ala alasyz. Bir jyl boıy kartaǵa tegin qyzmet kórsetiledi.
