Taıaýda Qaraǵandy men Qarqaralynyń erikti jastary «О́z elimde iz qaldyrmaı Sayahattime» ekoaksııasyn qoldap, joǵaryda aıtylǵan tártipsizdiktiń saldarymen kúreske shyqty. Belsendi jastar Qarqaraly memlekettik ulttyq tabıǵı parkindegi «Úsh úńgir» jartasyndaǵy jabaıy jazýlardy óshirdi. Volonterler jazbalardy joıýǵa arnaıy hımııalyq eritindilerdi paıdalandy. Keıbir jerlerde gaz qyzdyrǵyshtaryn da qoldanýǵa týra keldi.
Aıta ketý kerek, Qarqaralydaǵy týrıstik marshrýttar boıyndaǵy jazýlar men sýretterdi óshirý bastamasyn Kazakh Tourism ulttyq kompanııasy kótergen bolatyn. Al aksııany qoldaǵan Jana Dunie qaıyrymdylyq qory eriktilerdi jartasty tazartýǵa qajetti qural-jabdyqtarmen qamtamasyz etti.
Aksııaǵa belsene qatysqan Janaraı Sanaqbaı jartastaǵy jazýlardy joıý boıynsha osyndaı is-sharalardyń aldaǵy ýaqytta da jalǵasyn tabatynyna senim bildirdi.
– Biz oblys turǵyndary men Qarqaraly memlekettik ulttyq tabıǵı parkiniń qonaqtaryn tabıǵatty aıalaýǵa shaqyramyz. Aldaǵy ýaqytta munda tabıǵatty qorǵaýǵa shaqyratyn taqtaıshalar ornatatyn bolamyz. Sebebi biz jerimizdi urpaqtarymyzǵa bastapqy kúıinde saqtap, tapsyrýǵa mindettimiz, – deıdi jalyndy jas.
Jastardyń ónimdi jumysynan keıin «Úsh úńgir» jartasy burynǵy kelbetine ıe bolyp, jarqyraı tústi. Budan bólek aksııaǵa qatysýshy eriktiler senbilik uıymdastyryp, tóńirekti týrıster tastap ketken qoqystan tazartty.
Qaraǵandy oblysy,
Qarqaraly aýdany
