«Halyqaralyq TÚRKSOI uıymynyń uıytqy bolýymen jaryq kórgen týyndynyń tanystyrylymy aldymen Kastamoný qalasynda ótti. Is-sharaǵa QR Mádenıet jáne sport mınıstrliginiń, Almaty oblysy ákimdiginiń ókilderi, ónerpazdar men aqynnyń urpaǵy Juldyz Maqataev arnaıy keldi. Sondaı-aq tusaýkeserge TÚRKSOI uıymynyń bas hatshysy Dúısen Qaseıinov, QR Túrkııadaǵy elshisi Abzal Saparbekuly, Kastamoný provınsııasynyń gýbernatory Avnı Chakyr, Kastamoný qalasynyń meri Rahmı Galıp Vadınlıoǵly qatysyp, sóz sóıledi», delingen TÚRKSOI uıymy taratqan aqparatta.
M.Maqataevtyń óleńder jınaǵy alty tilde jaryq kórip otyr. Endi aqynnyń shyǵarmalaryn qyrǵyz, túrik, ázerbaıjan, ózbek, túrikmen jáne bashqurt tilderinde oqýǵa bolady. Aýdarmashylardyń arasynda Qyrǵyzstannyń tanymal aqyny Qojogeldi Kúltegin men túrkııalyq aqyn Kenan Charboǵa bar.
