Komıtettiń deregine súıensek, jumys berýshiler eńbek shartyn jasamastan 14 jasóspirimdi jumysqa tartyp, olar kúni boıy eńbek etken. Bul zańsyzdyqtar balalar eńbegin qanaýǵa qarsy ulttyq aqparattyq naýqan barysynda anyqtaldy.
«Aqparattyq naýqan elimizdiń barlyq óńirinde uıymdastyryldy. Is-shara sheńberinde balalar eńbegin qanaý máselesi jáne bul problemanyń bala men qoǵam úshin tıgizetin saldary týraly túsindirý jumystary, azamattardy habardar etý is-sharalary júrgizildi. Túsindirý jumystary barysynda Túrkistan, Qaraǵandy jáne Aqmola oblystarynda balalar eńbegin zańsyz paıdalaný faktileri anyqtaldy. Dámhanada daıashy jáne qurylys alańdarynda jumysshy bolyp eńbek etken 14 jasóspirimniń quqyǵy buzylǵan. Jumys berýshiler olardy tolyq jumysqa tartqan. Zań boıynsha 14 pen 18 jas aralyǵyndaǵy kámeletke tolmaǵandar úshin qysqartylǵan jumys ýaqyty belgilenýi tıis. Sondaı-aq jasóspirimdermen jáne olardyń ata-analarymen eńbek sharttary jasalmaǵan», dedi Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.
Balalardy eńbekke zańsyz tartý faktileri anyqtalǵannan keıin jumys berýshilermen jáne kámeletke tolmaǵandardyń ata-analarymen túsindirý jumystary júrgizildi.
Eńbek zańnamasyna sáıkes, 14 jasqa tolǵan oqýshylarǵa oqýdan bos ýaqytta densaýlyǵyna zııan keltirmeıtin jumystardy oryndaýǵa ruqsat etiletinin aıta ketken jón. 14-16 jas aralyǵyndaǵy balalar aptasyna 24 saǵattan, 16-18 jastaǵy jasóspirimder aptasyna 36 saǵattan artyq jumys istemeýi kerek. Bul rette jumys berýshi kámeletke tolmaǵan balanyń ózimen, onyń ata-anasymen, qamqorshysymen nemese bala asyrap alǵan ata-anamen eńbek shartyn jasaýǵa mindetti.
