О́tken jyldan beri jumyrtqa baǵasy 30%-ǵa ósti. Búginde qus fabrıkalary ár danasyn orta eseppen 17-20 teńgege satady. Onyń ústine alyp-satarlardyń baǵasy qosylady.
«Men kóterme baǵamen ár jumyrtqany 36 teńgeden alyp, ústine tek 2 teńge qosamyn. Qus fabrıkasynan alsa, arzanǵa túsetin shyǵar. Estýimshe, basqa jerlerde jumyrtqany 50-55 teńgeden satyp jatyr eken, biraq nege olaı bolyp jatqanyn bilmeımin. Ádette jazda baǵa túsedi. Mysaly, qysta ár danasyn 42 teńgeden satqanmyn», deıdi satýshy Kúnsulý Beısova.
Sońǵy aıda jumyrtqa baǵasy tómendedi. Sarapshylar buny suranystyń azdyǵymen baılanystyrady. Qazaqstan jumyrtqa óndirýshiler assosıasııasynyń aıtýynsha, naryqta suranys kóbeıse, baǵa da kúrt ósedi.
«Bul jyl saıyn baıqalatyn qubylys. Jumyrtqa óndirisi – maýsymdyq jumys. Jazda, mamyr-shilde aıy aralyǵynda, suranys azaıady. Mysaly, maýsymda suranys azaıǵandyqtan, fabrıkalar jumyrtqanyń ár danasyn 17 teńgeden sata bastady. Al kúzde qus fabrıkalary baǵany kóterip, ár danasyn 30 teńgeden satady. Sebebi baǵa jumyrtqanyń ózindik qunynan joǵary bolýy tıis. Iаǵnı, qus fabrıkalaryndaǵy baǵa ár danasyna 35-40 teńge aralyǵynda bolsa, dúkenderde 500-600 teńge bolady dep boljap otyrmyz», dep túsindirdi assosıasııa basshysy Maksım Bojko.
Búginde jumyrtqanyń sýpermarkettegi eń arzan baǵasy on danasyna 465 teńgeni quraıdy. Al bıyl óndirýshiler eki mıllıardan az jumyrtqa alǵan. Bul byltyrǵymen salystyrǵanda 13%-ǵa tómen. Sarapshylardyń aıtýynsha, buǵan qus tumaýy áser etken. 2020 jyldyń sońynda 2 mln qus ólip, bes fabrıkanyń jumysy toqtatylǵan edi.
Qazir sharýa qojalyqtary úı qustarynyń azyǵy qymbattap ketkenine shaǵymdanýda. Bul da jumyrtqa baǵasyna áser etetin faktorlardyń biri.
«Jem-sý baǵasy aldyńǵy jyly kılogramyna 100 teńge bolǵan, byltyr – 200, bıyl 360 teńgege shyqty. Mekıen taýyqqa 4-5 kılogramm azyq kerek. Budan jumyrtqa baǵasy 70%-ǵa deıin ósirýi múmkin. Sebebi azyq quny 100% qymbattap ketti. Úı jumyrtqasynyń on danasy – 1000 teńgege, fabrıkanyń jumyrtqasy 700 teńgege deıin kóterilýi múmkin», deıdi sharýa qojalyq ıesi Iýlııa Barsýkova.
Qus ósirýshiler azyq baǵasyna memleket tarapynan baqylaý bolsa deıdi. Olardyń aıtýynsha, jaǵdaı ózgermese, sharýashylyqtar jabyla bastaıdy. Sáıkesinshe, taýar sany azaıyp, baǵasy óse beredi.
Ásel Sarqyt
