Qylmystyq top músheleri sátsiz aıaqtalǵan áreketterdi eseptemegende, 13 kúnde eki adamdy óltirip, taǵy ekeýin uryp-soǵyp, tonap ketken.
Sottalýshylar sot úkimin onlaın tyńdady. 22-37 jas aralyǵyndaǵy shymkenttikterdiń qylmystyq áreketteri ótken jyldyń 4 qazanynda bastalǵan. Sol kúni olar eki telefon men aqsha urlaǵan. 8 qazanda qylmystyq toptyń eń kishi músheleri Nursultan Nuradınov pen Meıirhan Kenjebek 23 jastaǵy júgittiń 37 myń teńgesin urlap qana qoımaı, óltirip, denesin órtep jibergen. Bes kúnnen keıin olar dál sol shema boıynsha 38 jastaǵy azamatty 60 myń teńge úshin óltirip ketken. Sot zalynda marqumnyń aǵasy boldy.
«Biz sot úkimimen kelisemiz, biraq kináli tarap apellıasııaǵa bergen jaǵdaıda, biz sońyna deıin kúresýge daıynbyz. Olar meniń aǵamdy óltirdi. Endi ony eshkim qaıtara almaıdy. Onyń artynda eki birdeı balasy qaldy», deıdi marqumnyń inisi Aqjigit Iаsıtov.
Qylmyskerlerdiń taǵy ekeýi Ahmetov pen Kúmisov kisi óltirýge qatyspaǵany belgili boldy. Biraq taksı júrgizýshilerin tonaǵan dál solar. Sot olardy 10 jáne 11 jylǵa bas bostandyǵynan aıyrdy.
«2020 jyldyń 11 qazanynda qylmystyq top Shymkenttegi D. úıiniń aldyna keleji. Ahmetov pen Kúmisov aınalany qadaǵalap, saq bolý úshin kólikte qalsa, Nuradınov pen Kenjebek pyshaqtarmen qarýlanyp, dýal arqyly úıge kirmek boldy. Biraq terezelerge metall torlar ornatylǵandyqtan ishke kire almady», delingen sot úkiminde.
Qylmyskerlerdiń barlyǵy buryn sotty bolǵan. Oǵan qosa, barlyq qylmystardy mas kúılerinde jasaǵan. Olardyń úsheýi jazalaryn tótenshe qaýipsizdik kolonııalarynda óteıdi.
Botagóz AMALBEK
