QR Premer-Mınıstri Asqar Mamın bıyl 1 shilde kúni Almaty qalasyna jumys sapary aıasynda Úlken Almaty aınalma avtomobıl jolynyń (ÚAAAJ) salyný barysyn tekserdi.
Úkimet basshysy qurylys-montajdaý jumystarynyń qarqynyn arttyrýdy jáne barlyq sapa standarttaryn qamtamasyz ete otyryp, kesteden 2 jylǵa erterek, jumysty 2022 jyldyń sońyna deıin aıaqtaýdy tapsyrdy. A.Mamınniń aıtýynsha, atalǵan aınalma jol Almaty aglomerasııasyn ǵana emes, jalpy eldiń tranzıttik-kólik áleýetin damytý úshin de mańyzdy.
ÚAAAJ paıdalanýǵa berilgennen keıin táýligine shamamen 38 myń avtomobıl Almaty qalasyn aınalyp ótetin bolady. Bul Qytaı men Eýropa arasyndaǵy júk tasymaldaý kóleminiń ósýine de septigin tıgizedi dep kútilýde. Jobany iske asyrý kólik qyzmetin kórsetý sapasyn arttyrady, jol qozǵalysy qaýipsizdigin qamtamasyz etedi, avtomobıl kóliginiń qorshaǵan ortaǵa teris áserin azaıtady.
Qurylys alańyna shamamen 1600 adam men 600 birlik tehnıka jumyldyrylǵan. Qurylys asa belsendi júrgiziletin kezde 3 myńǵa jýyq adamdy tartý josparlanyp otyr.
Uzyndyǵy 66 km jáne alty jolaqty qozǵalysty úlken aınalma avtomobıl joly I tehnıkalyq sanat parametrlerine sáıkes keletin bolady. Avtojol qurylysymen qatar jańa kópirler, kólik jol aıryqtary men estakadalar salý kózdelgen.
Aıta keteıik, ÚAAAJ – Qazaqstan men Ortalyq Azııadaǵy memlekettik-jekeshelik áriptestik salasyndaǵy jol qurylysynyń iri ınfraqurylymdyq jobasy. Qurylys-montaj jumystarynyń quny 150 mlrd teńgeni quraıdy. Jobany Eýropa qaıta qurý jáne damý banki, Islam damý banki, Eýrazııa damý banki qarjylandyrady. Konsessııa shartyna 2018 jyly 20 jyl merzimge qol qoıyldy. Konsessıoner – «Alsım Alarko», «Makıol Inshaat», «SK Ekoplant», «Koreıa Ekspressveı» sekildi Túrkııa jáne Ońtústik Koreıa kompanııalary qurǵan «ÚAAAJ Investısııalar jáne Operasııalar» JShS.
