Jambyl oblysy ákiminiń baspasóz qyzmetiniń málimetinshe, jańa qonys ıeleriniń qataryna kópbalaly jáne az qamtylǵan otbasylar kirdi.
Otbasylarǵa páter kiltterin Jambyl oblysynyń ákimi Berdibek Saparbaev saltanatty túrde tabys etti.
«Halyqty turǵyn úımen qamtamasyz etý – memlekettik saıasattyń basym baǵyttarynyń biri. Turǵyn úı alý kezeginde 30 myńnan astam jambyldyqtar tur. Memleket basshysynyń tapsyrmasyna sáıkes birinshi kezekte kóp balaly jáne az qamtylǵan otbasylar, qajettilikteri shekteýli adamdar páter alady. Turǵyn úı máselesin sheshý úshin biz jergilikti kásiporyndardyń múmkindikterin de paıdalanamyz. Sondyqtan, múmkindiginshe kóp turǵyn úı salýǵa nıettimiz. «Asarlatyp úı salý» jobasy óz jemisin berýde. О́tken jyly 99 otbasy aýyldastary turǵyzǵan úılerdi syıǵa aldy. Bıyl 134 úıdiń qurylysy bastaldy. О́ńirde «Baqytty otbasy», «Shańyraq» baǵdarlamalary iske asyrylýda», dedi oblys ákimi.
Birinshi toptaǵy múgedek, kóp balaly ana Saǵatqul Kenjebekova bul kúndi 14 jyl kútti.
«Búgingi kún bizdiń otbasymyz úshin eń mańyzdy kún boldy. Balalarǵa jańa aýdan óte unady. Mundaı sátterde siz memlekettiń naqty qamqorlyǵyn sezinemiz», dedi Saǵatqul Kenjebekova.
Aıta ketsek, Jambyl oblysynda Prezıdent Qasym-Jomart Toqaevtyń tapsyrmalaryna sáıkes ómir sapasyn arttyrýǵa baǵyttalǵan baǵdarlamalar júzege asyrylýda. Aǵymdaǵy jyly 4482 páterlik 76 turǵyn úıdiń qurylysy júrgizilýde. Jyl sońyna deıin 2902 páterlik 50 turǵyn úı paıdalanýǵa berilmek.
