Abaı atyndaǵy Qazaq ulttyq akademııalyq opera jáne balet teatry 87-shi teatr maýsymynyń aıaqtalýyna oraı, kórermen nazaryna «Spartak» balettiń jańartylǵan nusqasyn usyndy. Qoıylymdy baletmeıster Gúljan Tutqybaeva, Reseıdiń halyq sýretshisi Vıacheslav Okýnev qoıdy. Qoıýshy dırıjeri - Qazaqstannyń eńbek sińirgen qoǵam qaıratkeri Erbolat Ahmedııarov.
Premeraǵa balet trýppasynyń barlyq quramy qatysty Basty partııalardy Janel Túkeeva, Azamat Asqarov, Arhat Áshirbek, Aıman Egisbaeva, Malıka Elshibaeva, Nelson Penıa, Gúlvıra Qurbanova, Rahym Daıyrov syndy jetekshi solıster oryndady.
Elý jyl burynǵy premerada Krass rólin somdaǵan QazKSR eńbek sińirgen ártisi Edýard Malbekov te ártisterge keńes berip, baǵyt-baǵdar kórsetken. Ol óz kezeginde qoıylymnyń týǵan sahnasyna qaıta oralǵanyna qýanyshty ekenin aıtty.
«Árıne, Gúljan Tutqybaeva men sýretshi Vıacheslav Okýnevtiń ózgertýleri engizildi. Alaıda ol Záýirbek Raıbaev qoıǵan spektakl kúıinde qalyp otyr. Barlyq balet trýppasy joǵary nátıje kórsetti. Osy qoıylym aıasynda eńbek etken barlyq maman óz mindetin minsiz atqaryp shyqty», dedi Edýard Malbekov.
Aıta keteıik, qoıylym úshin arnaıy 300-den astam kostıým tigilgen.
