Tujyrymdamaǵa sáıkes, «rezervtegi adam» uǵymy engizilgen. Ol – erikti túrde qorǵanys mınıstrligimen rezervte áskerı qyzmet ótkerý týraly kelisimshart jasasqan áskerı mindetti.
Zań jobasy maquldansa, tehnogendik nemese tabıǵı sıpattaǵy tótenshe jaǵdaılar týyndaǵan kezde rezervtegi áskerı qyzmetshiler birinshi kezekte qoldanylatyn bolady. Bul QR Qarýly Kúshterine ózine tán emes fýnksııalardy oryndaýǵa eleńdemeı, josparly túrde jaýyngerlik daıarlyqty jalǵastyrýǵa múmkindik beredi.
Rezervtegi áskerıler Qorǵanys mınıstrligi aıqyndaǵan tártippen barlyq áskerı-eseptik mamandyq boıynsha daıarlyqtan ótý arqyly áskerı qyzmet ótkeretin bolady. Olar úshin daıarlyq bir aıda bir-eki ret, al jıyn 30 kún ótkiziletin bolady. Jalpy alǵanda bir jylda eki aıdan kóp emes.
«Ýkraınadaǵy jáne Taýly Karabaqtaǵy oqıǵalar Qarýly Kúshterdi jumyldyrýmen, áskerı-oqytylǵan rezervti daıarlaýǵa jáne olardyń bar bolýyna, sondaı-aq shyǵyndy tolyqtyrý nemese jeke quramdy rotasııalaý úshin zapastaǵy áskerı qyzmetshilerdiń ýaqtyly kelýimen baılanysty bir qatar problemalyq máselelerdi anyqtady. Sondyqtan, azamattardyń rezervte qyzmet ótkerýin uıymdastyrý arqyly Qarýly Kúshterdiń áskerı bólimderin adam resýrstarymen qamtamasyz etýdiń zamanaýı qaǵıdattaryn qaıta qaraý qajettigi týyndaıdy», dep jazylǵan tujyrymdamada.
