Chınshanlodan – altyn, Jansaı Smaǵulovtan qola medal kútkenbiz. «Túıe surasań, bıe beredi», demekshi qorjynymyzǵa qola medal tústi. Qola medaldiń ıesi – Zúlfııa Chınshanlo.
Segiz jyl kútken júlde
Aýyr atletıkadan 55 kıloda baq synaǵan Zúlfııa julqa kóterýde birinshi múmkindiginde 90 kılony baǵyndyra aldy. Al ekinshi múmkindiginde 93 kıloǵa tapsyrys berip, ony da basynan asyrǵan. Alaıda tóreshiler alǵashynda eseptegenimen, keıinnen aqyldasa kele esepke almady. Al úshinshi múmkindiginde jerlesimiz taǵy da 93 kılony kótergenimen, úsh tóreshi de qyzyl túımeni basty. Osylaısha, sońǵy oryndardyń qatarynda turǵan Zúlfııanyń júldeger qatarynan kórinýinen kúder úze bastadyq. Sóıtsek, beker eken.
Zúlfııa serpe kóterýde bastapqyda 123 kıloǵa tapsyrys berip, ony ekinshi múmkindiginde basynan asyrdy. Sóıtip ol úshinshi múmkindigin paıdalanbaı-aq, úshinshi orynǵa taban tiredi.
2012 jylǵy London Olımpıadasynda chempıon atanǵan Chınshanlo, keıinnen dopıng daýyna iligip Olımpıada medalinsiz qalyp edi. Odan qalsa, Rıo Olımpıadasyna qatysý quqyǵynan aıyryldy. Osyndaı qıyndyqtarǵa qaramastan, Zúlfııa saǵy synbaı araǵa segiz jyl salyp Olımpıadanyń júldegeri atanyp otyr. Osylaısha, Tokıo Olımpıadasyna synǵa túsken eki ziltemirshimiz de qola medalǵa ıe boldy.
Bul salmaqta altyn medaldi Olımpıada rekordyn tirkegen Fılıppın ókili Hıdılın Dıas (224 kg) enshilese, kúmisti qytaılyq Lıao Kıýn (223 kg) ıelendi.
Endigi úmit – Elenada
Tokıo tatamıindegi básekeniń joǵary ekenin dzıýshylardyń beldeskeninen-aq bilýge bolady. Tatamıge shyqqannyń barlyǵy jeńis úshin baryn salyp jatqany baıqalady. Júldeden úmitti Jansaı Smaǵulov ta ekinshi irikteý kezeńin ádemi-aq bastady. 73 kıloǵa deıingi salmaqta synǵa túsken ol armenııalyq Ferdınand Karapetıandy jeńdi. Beldesýdiń negizgi ýaqyty teń aıaqtalyp, qosymsha ýaqytta Jansaı «vazarı» upaıyn enshiledi. Kádimgideı qýanyp qaldyq. Júlde alsa, naq osy Smaǵulov alady destik. Sebebi, budan jeńilgen armıan dzıýdoshysy ataǵy dardaı Eýropa chempıony. Áıtkenmen Smaǵulov úshinshi aınalymda kanadalyq Artýr Margelıdonnan aılasyn asyra almady. Margelıdon Grand Slam, Grand Prix týrnırlerinde únemi úzdik úshtikten kórinip júrgen ákki sportshy. Munda da beldesýdiń negizgi ýaqyty teń aıaqtalyp, jeńimpazdar qosymsha ýaqytta anyqtaldy. Birinshi bolyp «vazarı» upaıyn alǵan Kanada ókili kelesi aınalymǵa ótti.
Esesine qyzdar arasynda tennısten jalǵyz ózi qalǵan Elena Rybakına jarady. Qazaqstandyq tennısshi ekinshi aınalymda Shvesııa ókili Rebekka Petersonmen kezdesip, eki setke sozylǵan matchta 6:2, 6:3 esebimen jeńiske jetti. Kezdesý 1 saǵat 14 mınýtqa sozyldy. Buǵan deıin Zarına Dıas, Iаroslava Shvedova jáne Iýlııa Pýtınseva kúnniń ystyǵyna, jaraqatyna baılanysty jarysty jalǵastyrýdan bas tartqan bolatyn. Endi bar úmit – Rybakınada.
Al Olımpıadaǵa stend atý úshin kelgen mergen qyzdar elge erte qaıtatyndardyń tizimin tolyqtyrdy. Eki kúnge sozylǵan básekeden keıin Ásem Orynbaı men Zoıa Kravchenko bastaǵan mergender kelesi kezeńge óte almady.
«Skıt» jattyǵýy boıynsha synǵa túsken olar bes raýnd boıy irikteý kezeńin ótkizdi. Irikteý nátıjesi boıynsha alty sportshy ǵana kelesi aınalymǵa ótedi. О́kinishke qaraı, Zoıa Kravchenko 113 upaımen 22-oryn alsa, Ásem Orynbaı 111 upaımen 26-satyda qalyp qoıdy.
Bıbosynov kelesi kezeńge ótti
Bokstan erler arasynda báseke qyza tústi. 52 kılo salmaqta rıngke shyqqan Sáken Bıbosynov Pýerto-Rıko ókili Iаnkel Rıvera Fıgeroamen judyryqtasyp, 4:1 esebimen basym tústi. Sákenniń kelesi qarsylasy Ekaterınbýrgte ótken álem chempıonatynyń qola júldegeri, fransýz Bılal Bennama bolmaq.
Sadaq atýdan Qazaqstan erler quramasy komandalyq saıysta jeńilis tapqanymen, olar endi jekeleı synda óner kórsetedi. Sadaqshylardan jasaqtalǵan erler quramasy komandalyq saıysta Úndistan quramasyna qarsy shyǵyp, qarsylastaryna 2:6 esebimen ese jiberdi. Komandalyq básekede el quramasy sapynan jarys jolyna Sanjar Musaev, Ilfat Abdýllın jáne Denıs Gankın shyqty. Sadaq atýdan jekeleı jarystyń kelesi aınalymy 27 jáne 29 shilde kúnderi ótedi.
Slalomdy esýden fınalǵa shyqqan sporshylar qatarynda qazaqstandyq Aleksandr Kýlıkov joq. Jartylaı fınal qorytyndysy boıynsha Kýlıkov 12-oryn ıelendi. Fınalǵa ótý úshin alǵashqy ondyqqa ený kerek edi. Osylaısha, qazaqstandyq sportshy jarysty aıaqtady. Áıelder arasyndaǵy synda Ekaterına Smırnova da irikteý kezeńinen óte alǵan joq. Ústel tennısinen Qazaqstan komandasynyń úzdigi Kırıll Gerasımenko ekinshi aınalymda germanııalyq Tım Bollmen kezdesken bolatyn. Tartysty jekpe-jektiń alǵashqy partııasyn Kırıll jeńispen aıaqtaǵan. Alaıda keıingi tórt partııada nemis sportshysynyń sheberligi basym boldy. Nátıjesinde, kezdesý 1:4 esebimen qarsylastyń paıdasyna sheshildi.
