Tamyz aıynyń 8-nen 9-na qaraǵan túni Eskiqalalyq polısııa bólimine ortalyq aýrýhanaǵa ártúrli dene jaraqattarymen 27 jastaǵy qala turǵyny jatqyzylǵany týraly aqparat túsken. Oqıǵa ornyna jedel-tergeý toby jiberildi. Polısııa qyzmetkerleri oqıǵa sózge kelispeýshilik saldarynan bolǵanyn jáne travmatıkalyq qarý qoldanylǵanyn anyqtady.
«Krımınaldyq polısııa qyzmetkerlerimen júrgizilgen jedel-izdestirý is-sharalary barysynda oqıǵaǵa qatysqandardyń barlyǵy anyqtaldy. 20 men 37 jas aralyqtaryndaǵy tórt kúdikti ustaldy. Polısııa qyzmetkerlerimen buzaqylyq áreketti bastaýǵa sebep bolǵan 30 jastaǵy er adam anyqtaldy. Ol qaladaǵy úılerdiń aýlasynda jábirlenýshimen sózge kelispeı qalyp, travmatıkalyq qarýmen oq atqany týraly moıyndaý kórsetpe belgilerin berdi. Qazirgi ýaqytta ol ýaqytsha ustaý ızolıatoryna qamalyp, qarý tárkilendi», dep habarlady Qaraǵandy oblystyq Polısııa departamenti bastyǵynyń birinshi orynbasary Qurmanǵalı Ysmaǵulov.
Atalǵan fakti boıynsha Qazaqstan Respýblıkasy Qylmystyq Kodeksiniń 293-baby 3-tarmaǵyna sáıkes qylmystyq is qozǵaldy.
Qazirgi ýaqytta polısııa qyzmetkerlerimen oqıǵaǵa qatysqan basqa da azamattardy ustaý boıynsha keshendi is-sharalar júrgizilip jatyr.
