Saıasatker BAÁ-de ekenin, al Kabýldan aqsha alyp qashty degen qaýeset negizsiz ekenin aıtty.
«Kabýl qulaǵan kúni ne bolǵanyn egjeı-tegjeıli keıin aıtyp beremin... Aýǵanstannan ketýge májbúr boldym, sebebi Kabýlda qan tógilýine sebepshi bolǵym kelmedi», dep keltirdi onyń sózin RIA Novostı.
«Men Kabýldan aqshamen ketip qaldym degen aıyptaýlar shyndyqqa janaspaıdy», dedi Ǵanı. Sonymen qatar ol jaqynda Aýǵanstanǵa oralatynyn aıtty.
Aýǵan basshysy otandastaryn óz halqyn satty jáne bas amandyǵy úshin qashyp ketti degen sózderge senbeýge shaqyrdy.
«Eger bireý sizge «Prezıdent senderdi satyp ketti, óziniń qarjylyq múddesi jáne janyn aman alyp qalý úshin qashty» dese, senbeńiz», dedi Ǵanı.
Prezıdent Aýǵanstanda oǵan daıyndalyp jatqan qastandyq týraly habarlanǵanyn aıtty.
Buǵan deıin BAÁ SIM Aýǵanstan Prezıdenti Ashraf Ǵanı men onyń otbasy elde ekenin rastaǵan.
Sondaı-aq Ǵanı elden qashyp bara jatqanda, memleket qazynasynan 169 mıllıon dollar jymqyrdy delingen bolatyn.
