Saltanatty kesh Italııanyń Breshıa qalasynda ótti. Oǵan komandanyń demeýshileri, sportshylardyń otbasy músheleri men buqaralyq aqparat quraldardardyń ókilderi qatysty. Bul týraly egemen.kz tilshisi habarlady.
Rásimde «Astana» komandasynyń bas menedjeri Aleksandr Vınokýrov bıylǵy maýsymda jarys jolyna shyǵatyn veloshabandozdary tanystyryp, komandanyń aldaǵy maqsat-mindetterin jarııa etti. Onda Vınokýrov 2014 jyly komandanyń aldyna qoıǵan basty maqsaty «Týr de Frans» kópkúndiginde jeńiske jetý ekendigin aıtty. "О́tken jyly barlyǵymyz at salysyp «Djıro d Italııada» jeńiske jettik. Dittegenge jetý ońaı bolǵan joq. Biraq aldymyzdan shyqqan qıyndyqtarǵa moıymaı, bir jaǵadan bas, bir jeńnen qol shyǵaryp, Breshıa qalasynynyń tórinde tuǵyrdyń eń bıik satysyna kóterildik. Sondyqtan maýsymdy Breshıada bastaý biz úshin úlken qurmet. Al aldaǵy maýsymda «Týr de Fransta» myqty atanýǵa barymyzdy salamyz," - dedi ol.
Byltyr Breshıada ótken «Djıronyń» sońǵy kezeńine ıyǵyna qyzyl kúlgin jeıdeni kıip jetken «Astana Pro Team» kapıtany Vınchenso Nıbalı «Týr de Frans» qazaqstandyq veloujymnyń aldyna úlken maqsattar qoıyp otyrǵanyn aıtty. "Shilde aıynda ótetin «Týr de Frans» – komandanyń basty maqsaty. Sondyqtan bizdiń barlyq josparymyz osy maqsatqa jetýdi kózdeıtin jarystardan turady. Lıdsede bastalatyn mártebeli kópkúndikke óz babymyzda kelemiz degen senimdemiz. Birneshe kúnnen keıin uzaqqa sozylatyn maýsymnyń betashary Argentına men Avstralııaǵa attanamyz. Sondaı aq, bizdiń komanda Mılan-Sanremo, Lej-Baston-Lej, Parıj-Nıssa, Tırreno-Adrıatıkoda jeńiske talasady, al «Djıro Italııada» jeńimpaz jeıdesin qorǵaýǵa barymyzdy salatyn bolamyz. Dittegenge jetý ońaı bolmasy anyq. Komandanyń barlyq músheleri aıanyp qalmasynada senimdimin," – dedi Nıbalı.
Osydan keıin rásimde «Astana Pro Team» kapıtany Nıbalı bastaǵan komanda shabandozdarymen qatar komandanyń jańa músheleri Mıkel Landa (Ispanııa), Lıýv Vestra (Nıderlandy), Valentın Iglınskıı (Qazaqstan) men Mıkele Skarponı (Italııa) syndy shabandozdardyń komanda sapyna qosylǵandyǵy resmı jarııa etildi.
Dastan Kenjalın.
Derekkóz: «Astana Pro Team» velokomandasynyń baspasóz hatshysy Krıs Boldıýn, www. proteam-astana.com
