Azııa boks federasııasy ótken jylǵy jumystaryn qorytyndylap, qurlyqtyń úzdikterin anyqtady. Bul týraly egemen.kz tilshisi habarlady.
Onda «Jyldyń eń úzdik er boksshysy» nomınasııasy boıynsha bas júldege Mereı Aqshalov ıe boldy. Bul ataqty qurlyqtyq federasııa Aqshalovqa byltyr álem jáne Azııa chempıonatyn jeńip alǵany úshin berdi. Kelesi «Jyldyń eń úzdik jas boksshysy» ataǵyn da qazaqstandyq boksshy ıelendi. Bul nomınasııa boıynsha syılyqty Abylaıhan Júsipov aldy. Ol byltyr 57 kılo salmaqta Ýkraınanyń Kıev qalasynda ótken álem chempıonatyn utyp alsa, Shymkentte Azııa chempıony atanǵan bolatyn. Qazir Abylaıhan 16 jasta. Buǵan deıin www.egemen.kzsaıtynda jazǵanymyzdaı, Samat Bashenov WSB serııasy boıynsha Azııanyń úzdik boksshysy atandy. Al Qazaqstan boks federasııasy 2013 jyldyń «Azııa qurlyǵyndaǵy eń úzdik federasııa» dep tanyldy. Sonymen birge «Jyldyń basty jańalyǵy» ataǵyn qyrǵyz Azat Úsenálıev ıelendi. Byltyr Azııa chempıonatyn jeńip alǵan Alataýdyń ar jaǵyndaǵy aıyrqalpaqty aǵaıyndardyń boksshysy bul ataqqa ábden laıyq dep bilemiz.
Halyqaralyq áýesqoı boks qaýymdastyǵynyń saıtynda Mereı Aqshalov týraly jarııalanǵan materıaldy myna jerden kórýge bolady: http://aiba.org/en-US/news/ozqsp/newsId/5684/news.aspx
Dastan Kenjalın.
Derekkóz: http://aiba.org
