Beıneý aýdanyna arnaıy barǵan senatorlar jergilikti orta mekteptiń jańa korpýsynyń qurylys jumystaryna nazar aýdardy. Jańa nysan bilim ordasynyń syıymdylyǵyn taǵy 312 orynǵa kóbeıtedi. Depýtattar bul jumystyń mańyzdylyǵyn atap ótip, jańa korpýs úsh aýysymmen oqytýdy joıýǵa múmkindik beretinin, ıaǵnı muǵalimder men oqýshylar, sondaı-aq olardyń ata-analary úshin bilim berý prosesi neǵurlym yńǵaıly bolatynyn jetkizdi.
Sonymen qatar senatorlar aýdandyq emhanada bolyp, medısına qyzmetkerlerimen kezdesti. Qazirgi tańda emhana júktemesiniń shamadan tys kóp bolýy aýdandaǵy mańyzdy máselelerdiń biri bolyp otyr. Naqty aıtqanda, bastapqyda tórt myń adamǵa eseptelgen emhana qazir 15 myńnan astam naýqasqa qyzmet kórsetedi. Sondyqtan kezdesý barysynda taǵy bir emhana salý máselesi kóterildi. Depýtattar qazirgi qalyptasqan jaǵdaıda aýdan turǵyndary da, dárigerlerdiń ózderi de zardap shegetinine nazar aýdaryp, aımaq basshylyǵyna atalǵan túıtkildi tez arada sheshýdi qolǵa alý qajettigin aıtty.
Sondaı-aq Súıindik Aldashev pen Baqtybaı Shelpekov jergilikti sút kombınatyna bardy. Búginde atalǵan kásiporynda jylyna 430 mln tekshe metr sút ónimderi óndiriledi. Aldaǵy ýaqytta 1 mlrd teńge ınvestısııalaý arqyly kombınattyń óndiristik qýatyn arttyrý josparlanyp otyr.
Al Senat depýtaty Ábdáli Nuralıev Jambyl oblysynyń Sarysý aýdanyna bardy. Sapar barysynda ol Kúıik – Qarabastaý – Qarataý – Jańatas – Saýdakent avtomobıl jolyn qaıta qalpyna keltirý jumystarymen tanysty. Senator atalǵan avtojoldyń aýyl turǵyndary úshin mańyzy zor ekenin atap ótti. Sondyqtan ol merdigerler men aýdan basshylyǵy jóndeý jumystaryn sapaly júrgizýge jáne bólingen qarajatty oryndy jumsaýǵa basa mán berý kerektigin aıtty.
Buǵan deıin aýyl turǵyndary oblys aýmaǵy arqyly ótetin avtojoldardy jóndeýge qosymsha qarjy bólý máselesin birneshe ret kótergen bolatyn. Senatormen kezdesýde respýblıkalyq bıýdjetten 92,3 mln teńge bólý týraly sheshim qabyldanǵany aıtyldy. Ol qarjy Shyǵanaq jáne Jaılaýkól aýyldarynyń kirme joldaryn jóndeýge jumsalady.
Sonymen qatar Ábdáli Nuralıev Jańatas qalasynda salynyp jatqan kóppáterli turǵyn úılerdiń qurylys alańyna bardy. Qazirgi tańda turǵyn úı kezeginde 1676 adam tur. Olardyń qatarynda jetimder, kópbalaly analar, az qamtylǵan otbasylar jáne bıýdjettik uıymdardyń qyzmetkerleri bar. Salynyp jatqan úıler bıyl paıdalanýǵa beriledi. Aýdan ákimi muqtaj azamattardy turǵyn úımen qamtamasyz etý jumystary jalǵasatynyn jetkizdi.
Sondaı-aq senator sapar barysynda gaz qubyrlarynyń qurylys barysymen tanysty. Damý josparyna sáıkes aldaǵy 2 jylda aýdanda 14 eldi meken gazdandyrylady.
