Memleket basshysyna kásiporynnyń jumysy tanystyrylyp, aldaǵy josparlary týraly málimet berildi. Kompanııa basshylyǵynyń málimetine sáıkes 4,5 gektar aýmaqty alyp jatqan kásiporynǵa 30 mıllıard teńge ınvestısııa salynǵan.
Kompanııa Japonııa, Shveısarııa jáne Germanııadan ákelingen ınnovasııalyq qurylǵylarmen tez daıyndalatyn azyq-túlik ónimderin shyǵarady. Kásiporynnyń jylyna 85 myń tonna ónim shyǵarýǵa múmkindigi bar.
«Mareven Fýd Tıan-Shan» JShS 670 adamdy jumyspen qamtyp otyr. Onyń 95 paıyzy jaqyn mańdaǵy eldi mekenderdiń turǵyndary. Kásiporyn 500 mıllıon qaptama shyǵarsa, sonyń 70 paıyzy eksporttalady.
Qasym-Jomart Toqaevqa oblys ákimi Amandyq Batalov óńirdegi júzege asyrylyp jatqan ınvestısııalyq jobalar men oblystyń áleýmettik-ekonomıkalyq damýy týraly esep berdi.
Oblys ákiminiń aıtýynsha, aımaq ekonomıkasyna 312 mıllıard teńge ınvestısııa tartylyp, 40 myń jumys orny ashylǵan. Bıyl óńirde jalpy quny 112 mıllıard teńge bolatyn 65 joba iske asyrylyp jatyr.
Amandyq Batalov Prezıdenttiń byltyrǵy Germanııaǵa jasaǵan saparynyń nátıjesinde «Baýmann» kompanııasy usaq mal etin óńdeıtin qýaty 30 myń tonnalyq «Jetisý qoı» jobasyn qolǵa alǵanyn habarlady.
Qasym-Jomart Toqaev oblysta atqarylyp jatqan ınvestısııalyq jobalarǵa oń baǵa berip, bastalǵan jumystardy ýaqtyly aıaqtaýǵa tapsyrma berdi.
