Ekologııa • 24 Tamyz, 2021

Qazaqstanda alǵash ret qoldan jańbyr jaýǵyzý ádisi qoldanylýy múmkin

690 ret kórsetildi

Mańǵystaý óńirlik kásipkerler palatasynyń alańynda qýańshylyqpen kúres máselesi talqylanyp, jasandy jolmen jańbyr jaýdyrý tehnologııasy usynyldy, dep habarlaıdy Egemen.kz.

Tehnologııa aprobasııadan ótse, óńirde bes qurylǵy qondyryp, barlyq jerge jańbyr jaýdyrýǵa bolady. Nátıjesinde, qýańshylyqtan zardap shekken sharýalardyń máselesi sheshilip, maldyń qyrylýy toqtamaq.

Otyrysqa qatysqan fermerler, ǵalymdar, kásipkerler men oblystyq ákimdik ókilderi jańa tehnologııaǵa qatysty jan-jaqty máseleni kóterdi.

«Qazir Mańǵystaý, Qyzylorda, Túrkistan oblystarynda qurǵaqshylyq bolyp jatqany ózderińizge belgili. (...) Maldyń kólemi, jerge ekosıd, ósimdiktiń óspeýi, mal jaıylymynyń tarylýy sııaqty kóptegen másele týyndap jatyr. Biz problemadan shyǵý úshin elge qajet ádisterdi izdep, klımattyq tehnologııanyń bar ekenin bilip, mamandardy Mańǵystaýǵa shaqyrdyq. Qazir qoldan jańbyr jaýdyrýdan basqa jolyn kórip otyrǵan joqpyz», dedi Mańǵystaý oblysy kásipkerler palatasy óńirlik keńesiniń tóraǵasy Edil Jańbyrshın.

Birneshe memlekette synalǵan jahandyq International Center of Climate Change Technologies jobasyn elimizge ákep otyrǵan Central Asian Center of Climate Change Technologies kompanııasynyń basshysy Altaı Aınabektiń aıtýynsha, bul tehnologııanyń negizinde álemde birneshe ǵana kompanııa jumys isteıdi. Azamattyq maqsatta qoldanýǵa bolady. Qorshaǵan ortaǵa, adamdarǵa, jan-janýarǵa, ushaqtarǵa áser etpeıdi – eshqandaı zııany joq. Ol týraly eýropalyq De Nayer zerthanasynyń oń qorytyndysy bar – Clear Sky Manager tehnologııasy.

«Teris ıondardy atmosferaǵa jiberý arqyly atmosferadaǵy ártúrli deńgeıdegi ylǵaldardy shoǵyrlandyryp jáne Kaspıı teńiziniń akvatorııasyndaǵy býlanǵan ylǵaldardy Mańǵystaýdyń tereń aýdandaryn tasymaldaý arqyly bulttar túziledi jáne kerek jerde jaýdyrylady. Biz usynyp otyrǵan Clear Sky Manager 5 jáne Clear Sky Manager 7 tehnologııalary Reseı, AQSh, Japonııa, EýroOdaqta patenttelgen. Klımatty basqarý salasynyń álemdik deńgeıde moıyndalǵan doktorlary, meterıalolog, aerolog jáne basqa mamandar jumys isteıdi», dedi Altaı Aınabek.

Sońǵy jańalyqtar

Uqsas jańalyqtar