Ulttyq bank nesıeleý boıynsha bankter arasynda saýaldama júrgizip, nesıe resýrstaryna degen suranys pen usynystyń negizgi úrdisterin anyqtaýǵa tyrysyp kórgen. Qarjylyq turaqtylyq jáne zertteýler departamenti dırektorynyń mindetin atqarýshy Oljas Kóbenbaevtiń aıtýynsha, II toqsanda shaǵyn bıznes tarapynan túsken ótinimderdiń jalpy sany I toqsanmen salystyrǵanda 29 paıyzǵa ósip, 155 myńdy quraǵan.
«Iri bankterde nesıege degen suranys iri bıznes tarapynan tómendegenimen, bankterdiń kópshiligi orta bızneste suranys artqanyn atap ótti. Iri jáne orta bıznes tarapynan túsken nesıe ótinimderiniń sany toqsan ishinde jalpy aıtqanda 9 paıyzǵa 1,3 myńǵa deıin ósti. Bankterdiń bıznesti nesıeleýge daıyndyǵy artty. Kásipkerliktiń iri jáne orta segmentindegi maquldaý koeffısıentteri ósip, ótken toqsandaǵy 55 paıyz jáne 57 paıyzben salystyrǵanda, tıisinshe 62 paıyz jáne 76 paıyzdy qurady» deıdi O.Kóbenbaev.
Alaıda memlekettik baǵdarlamalarǵa qatysýshy bankterge shaǵyn bıznes tarapynan túsken nesıe ótinimderiniń maquldaý úlesi 24 paıyz bolǵan. Bul kórsetkish birinshi toqsanda 31, byltyrǵy tórtinshi toqsanda 76 paıyz bolǵan edi. Ázirge bankter nesıeleý talaptaryn ózgertýdi josparlap otyrǵan joq. Olar úshinshi toqsanda kásipkerliktiń barlyq segmenti tarapynan suranys artady dep kútetinin jasyrmaıdy.
«2021 jyldyń II toqsanynda ıpotekalyq nesıeleýge degen suranystyń artýy – «Baspana hıt» baǵdarlamasy boıynsha bólingen lımıtterdi ıgerýdiń aıaqtalǵany týraly habarlandyrýmen jáne halyqtyń turǵyn úı satyp alý nemese jóndeý maqsatynda zeınetaqy jınaqtaryn qoldaný baǵdarlamasyna degen qyzyǵýshylyǵynyń jalǵasýymen baılanysty. Ipotekalyq nesıeler boıynsha ótinimder sany 30 paıyzǵa ósip, 97 myńdy qurady, al maquldaý úlesi II toqsanda 74-ten 78 paıyzǵa deıin ulǵaıdy», dedi departament ókili.
Respondentterdiń aqparaty boıynsha, marketıngtik aksııalar ótkizý jáne paıyzdyq mólsherlemelerdiń ózgerýi kepilsiz tutynýshylyq nesıeler men avtonesıe boıynsha suranystyń ósýine oń áser etipti. Eseptik toqsanda olar boıynsha ótinimder sany 31 jáne 11 paıyzǵa ósip, maquldaý úlesi 47 jáne 14 paıyzdy quraǵan. Sonymen qatar jekelegen bankterdegi klıentterdiń tólem qabilettiligine qoıylǵan joǵary talaptar kepilmen qamtamasyz etilgen tutynýshylyq nesıelerge degen suranysty birshama azaıtty.
Bankterdiń bólshek nesıeler berýge daıyndyǵy burynǵy qalpynda qaldy. Sonymen qatar tutynýshylyq nesıe shartynda syıaqy mólsherlemesiniń tómendeýi, nesıe óteýdegi eń uzaq merzimniń ulǵaıýy jáne paıyzdyq mólsherlemege qatysy joq komıssııalardyń da tómendeýi baıqaldy, deıdi O.Kóbenbaev.
«Kelesi toqsanda jeke bankter óz ónimderi boıynsha paıyzdyq mólsherlemeni tómendetýdi josparlap otyr jáne sáıkesinshe, ıpotekalyq nesıelendirýge degen suranystyń artýyn kútedi», dedi UB ókili.
