Bul joba jaıynda Elbasy: «Jastar ómirge shynaıy kózben qarap, óz taǵdyrlaryna ózderi ıelik ete alatyn azamattar bolýy úshin olarǵa úlgi usynýymyz kerek», degen bolatyn. Elimizdiń ár óńirindegi túrli salada jetistikke jetken talantty jastardy nasıhattaýdy maqsat etken tyń joba arqyly egemendi eldiń irgesi berik qalanyp jatqan tusta jastar eldiń jańa tarıhyn jasaýy kerek. Igi bastamanyń negizgi muraty da osy.
«Qazaqstannyń 100 jańa esiminiń» bıylǵy jeńimpazdarynyń arasynda jas mýzykant Arystan Ábildın de bar. 18 jastaǵy qaraǵandylyq talant ıesi jazǵan kaver álemdik Shazam-ǵa ilikken bolatyn. Sonymen qatar ol – tanymal reper Jah Khalib uıymdastyrǵan mýzykalyq baıqaýdyń jeńimpazy. Aıta keteıik, «Mádenıet jáne sport» atalymynda jeńiske jetken jas daryn úshin 2 790 úmitker qatysqan konkýrsta top jarý – úlken jetistik.
О́nerpazdar otbasynda ósken ol mýzykaǵa bala kezinen áýestengen. Ákesi mýzyka mektebiniń dırektory bolsa, anasy – hor jetekshisi. Bes jasynan bastap fortepıano men barabanda oınaı bastapty. Ata-anasy mýzykant bolǵan soń perzentiniń ónerden alys ketpeýi zańdylyq shyǵar.
Jastaıynan ómirlik jolyn aıqyndaǵan Arystan óz shyǵarmashylyǵy týraly: «Alǵashqy avtorlyq ánimdi súıikti qyzyma arnaǵan edim. Ony áleýmettik jeli qoldanýshylary joǵary baǵalap, mýzykamen maqsatty túrde aınalysýyma jiger berdi. Bul meni jańa shyǵarmalarǵa shabyttandyrdy», deıdi.
Colorit laqap atymen óner kórsetetin ónerpaz TikTok jáne Instagram áleýmettik jelilerinde tanymaldyqqa ıe boldy. Ol qazaqstandyq, reseılik jáne sheteldik ártisterdiń ánderine kaver jazady. Onyń rolıkteri mıllıon qaralymǵa jetip, jankúıerler sany kún sanap artyp keledi. Ol jazǵan sheteldik áýender nusqasyna Egor Krıd, Klava Koka jáne basqa da tanymal ártister beınekórinis túsirip júr.
Áleýmettik jelilerdegi osyndaı nátıjeden soń Arystan Ábildınniń tarapyna tanymal reseılik Black Star jáne Sony Music leıbldan usynystar túsken. Qazir mýzykant Zivert, Feduk, Ivan Dorndy nasıhattaýmen aınalysatyn P.M.I. Music mýzykalyq uıymymen kelisimshartqa otyrdy. Kóktemde shaǵyn jeke albomy jaryqqa shyqty.
«Jaqynda áriptestik kelisimshart jasastyq. Osyndaı erekshe múmkindik alǵanyma qýanyshtymyn. Bizdiń kompanııa áriptestik ornatqan reseılik birlestik Ivan Dorn, Zıvert, Fılıp Kırkorov sııaqty tanymal oryndaýshylarmen jumys isteıdi. Osy múmkindikti paıdalanyp kóptegen jańa hıtter shyǵaramyz dep úmittenemin», deıdi mýzykant.
Arystannyń áleýmettik jelilerdiń mýzyka alańyndaǵy kórsetkishine taǵy bir toqtalsaq, Slava Marlow & Morgenshtern aıtatyn «Bystro» tregi resmı túrde paıda bolǵannan keıin VK men Apple Music charttarynda ǵana emes, sonymen qatar Shazam álemdik top-chartynda jetekshi orynǵa ıe bolǵan edi. Ol Dua Lipa men Billie Eillish-ten de ozyp tústi. Osylaısha, trek reseılik jáne qazaqstandyq TikTok-taǵy trendke aınalyp úlgerdi. Al kaver tórt mıllıonnan asa ret qaralyp, oǵan 190 myń beınekórinis túsirildi. Mýzykanttyń ókilderi bunyń TikTok-taǵy eń tanymal qazaqstandyq trek ekenin málimdegen edi. Kaverge óleń avtory Slava Marlow da óz baǵasyn berdi.
Onyń armany – álemdik sahnalarda án salyp, shyǵarmashylyq ıesine aınalý. Arystannyń úlken armanyna jaqyndaýyna «100 jańa esim» jobasynyń yqpaly tıeri anyq.
«Joba jeńimpazdarynyń arasynda bolǵanyma erekshe qýanyshtymyn. Bul – men úshin jańa qadam. Árıne, bul meniń jeke azamat retinde damýyma jáne jańa shyǵarmashylyq shyńdardy baǵyndyrýyma áser etetini anyq», deıdi ol.
Qazirgi tańda ónerpaz jańa án jazý ústinde. Al týyndynyń ataýy ázirshe belgisiz. Jýyrda ǵana Arystan halyqaralyq mýzykalyq konkýrsta birinshi orynǵa ıe bolǵan. Qazaqstandyq ónerpaz AQSh, Fransııa, Germanııa, Anglııa syndy memleketterden qatysqan mýzykanttardy shań qaptyrypty. Onyń bul jolǵy oryndaýy YouTube jelisindegi paraqshasynda tur. Túsirilim jumystary Almaty qalasyndaǵy Abaı atyndaǵy Qazaq memlekettik Akademııalyq opera jáne balet teatrynda ótken. Túsirilimge barabanda oınaǵan Arystannyń ákesi de qatysqan. Aıta keteıik, jas talant qazir Qaraǵandydaǵy Táttimbet atyndaǵy óner kolledjinde «Baraban» mamandyǵy boıynsha tórtinshi kýrsta oqıdy. Aldaǵy jospary – Qurmanǵazy atyndaǵy Qazaq ulttyq konservatorııasynda joǵary bilim alý.
«100 jańa esim» jobasynyń jeńimpazdary bolashaqta táýelsizdik tarlandary bolýy ábden múmkin. Qazaqstannyń jańa zamanǵy kelbetin qalyptastyrýǵa umtylǵan tulǵalardan ónege alǵan jastar da ómirlik jetistikterge jetýge hám ultyna qyzmet etýge umtylatyn bolady.
