Bul týraly KTK telearnasy habarlady.
Eks-sheneýnikke medısına qyzmetkerlerine betperde satyp alý kezinde memleket múlkin urlady degen aıyp taǵylǵan edi. Sáýirde bastalǵan iske keshe Bostandyq aýdandyq soty núkte qoıdy.
Sot sheshimi boıynsha Ásel Beısenbaeva memlekettik satyp alý kezinde 4 mln dana maskany 230 mln teńgege zańbuzýshylyq jolmen alǵan. Bul iste odan bólek 5 adam tergeldi. Barlyǵy 7 jáne 7,5 jyl kóleminde jaza arqalady. Biraq, Bısenbaeva kinásin moıyndamady. Aıtýynsha, onyń elektrondy sıfrlyq qoltańbasyn basqalar paıdalanǵan. Onlaın qol koıý kezinde ákimdikte jınalysta bolǵany dáleldense de, ol esepke alynbaǵanyn aıtady. Tipten, sol kezdegi tikeleı basshysy Kamaljan Nadyrov onyń ketýin talap etip, artyna sham alyp túskenin alǵa tartty.
«Nadyrov óziniń elektrondyq qoltańbasyn memlekettik satyp alý portalynda qol qoıýǵa bermeı qoıǵan. Al, maǵan shuǵyl jumysty bitirý kerek dep kelgen áriptesim bári zań júzinde, kepil bolamyn degen soń sendim. Ol kezde medısına qyzmetkerlerin as-sýmen qamtý kerek bolatyn. Keıin prokýratýra alǵan betperdelerdiń talapqa saı kelmeıtini anyqtaldy. Meni zańsyz sottady. El prezıdentinen quqyǵymdy qorǵaýyn suraımyn! Qalalyq sotqa apellıasııalyq shaǵym túsiremiz!», dedi Ásel Beısenbaeva.
