Osy jyldyń 16 maýsymynda jumystan shyqqan áıeldi burynǵy kúıeýi Azamat Moldahmetov qýyp jetip, kezekti janjal ústinde denesiniń birneshe jerine pyshaq salǵan. Moıyn arterııasyna túsken jaraqattyń tereń bolýy sebebinen Darına Ahmadıeva jedel járdem kóliginde jan tapsyrdy. Darınanyń artynda 11 jasar uly qalǵan.
5 jyldan beri áıeliniń sońyna túsken Azamat Moldahmetov burynǵy áıelin pyshaqtaǵan soń óz ishine pyshaq salǵan. Ony ekinshi jedel járdem brıgadasy aýrýhanaǵa jatqyzyp, qalalyq aýrýhananyń hırýrgteri ota jasady.
Jantúrshigerlik oqıǵadan keıin QR QK 99 -baby «Adam óltirý» boıynsha is qozǵaldy.
Sot aldynda jábirlenýshi dep tanylǵan marqum Darına Ahmadıevanyń ápkesi Ásel Shamǵanova sińlisiniń otbasynda tabystyń bolmaýy men kúıeýi tarapynan bolǵan qyzǵanyshtyń saldarynan otbasyn saqtap qalý múmkin bolmaǵandyǵyn jetkizdi. Alaıda sińlisiniń burynǵy kúıeýine balasymen qarym-qatynas jasaýǵa tyıym salmaǵanyn, sońǵy kezderi Darına Ahmadıevaǵa seni óltiremin dep jıi jazǵanyn aıtty.
Sottalýshy Azamat Moldahmetov óz kezeginde balasy 8 jasqa tolǵanda 2 aı kórýge múmkindik bermegenin aıtyp, qylmysyn tolyq moıyndaǵan.
Búginde tergep-tekserý amaldary jalǵasyp jatyr.
