«Aqmola oblysynda Nur-Sultannan alaıaqtyq jolmen ákelinip, qyrkúıek aıynyń basynan beri jaýapkershiligi shekteýli seriktestikterdiń birinde eńbek etip júrgen úsh adamdy zańsyz ustaý deregi anyqtaldy. Olar egistikten jınalǵan kartopty suryptaýmen aınalysqan. Kúnine 8 myń men 10 myń teńge arasynda tóleýge ýáde etken, biraq jalaqy tólenbegen. Jábirlenýshiler túnde konteınerlerde qonyp, táýligine 12-13 saǵat jumys istegen. Úılerine qaıtqysy kelgende, qorqytyp, zańsyz ustaǵan», dedi Nurmaǵambetov brıfıngte.
Onyń aıtýynsha, qazir bul jaǵdaıǵa qatysty Qylmystyq kodekstiń 128-baby «Adam saýdasy» boıynsha qylmystyq is qozǵaldy.
«Polısııa qyzmetkerleri eki aı boıy azamattardy kúsh kórsetip, qorqytyp ustaǵan Aqtóbe oblysynyń turǵyny, 50 jastaǵy sharýa qojalyǵynyń ıesin anyqtap, polısııaǵa jetkizdi», dedi Qanat Nurmaǵambetov.
Qylmystyq kodekstiń 128-baby boıynsha qylmystyq is qozǵalǵan.
Krımınaldyq polısııa basqarmasy bastyǵy orynbasary jábirlenýshilerge tıisti áleýmettik kómek kórsetiletinin aıtty.
«Birneshe kún buryn «Stop trafık» atty jedel jáne aldyn-alý sharasy ótkizildi. Operasııa barysynda polıseıler adam saýdasyna qatysty 70-ten astam qylmysty ashty. Onyń ishinde bas bostandyǵynan aıyrý deregi, adam saýdasynyń úsh deregi, kámeletke tolmaǵandardy satý boıynsha 7 derek, jezókshelikpen aınalysýǵa qatysty 16 derek, onyń ishinde kámeletke tolmaǵandardyń úsh deregi anyqtaldy. Jezókshelikpen aınalysýǵa baılanysty jáne satyp alý úshin úı-jaılardy uıymdastyrý men ustaýdyń 47 deregi anyqtaldy», dedi Nurmaǵambetov.
