Qaraǵandy qalasynyń Qazybek bı aýdandyq soty «Qaraǵandy oblysy boıynsha ekologııa departamenti» RMM bas mamanyna qatysty alaıaqtyqqa áreket isi boıynsha úkimin jarııalady.
Sotqa deıingi tergep-tekserý organdary Departament qyzmetkerine QK-niń 24-babynyń 3-bóligi-190-babynyń 3-bóligi-1, 2-tarmaqtary boıynsha alaıaqtyq jasady, ıaǵnı memlekettik fýnksııalardy oryndaýǵa ýákilettik berilgen adam óziniń qyzmet babyn paıdalana otyryp adamdar tobynyń aldyn ala sóz baılasýy boıynsha iri mólsherde aldaý jolymen bótenniń múlkin urlady degen aıyp taqty.
Tekserý nátıjesinde ekologııa departamentiniń ókili bir kásiporynǵa tekserý júrgizip, onda qorshaǵan ortaǵa zııan keltirgen ekologııalyq zańnama talaptarynyń buzylǵanyn anyqtaǵany belgili boldy. Sodan keıin ekolog osy JShS tehnıkalyq dırektorymen birlesip, bul jaǵdaıda qalaı paıda tabýǵa bolatynyn josparlaǵan.
Osylaısha, departament qyzmetkeri qorytyndyda seriktestiktiń ekologııaǵa keltirgen zalalynyń eń joǵary somasyn kórsetýge, al keıinnen 10 mln teńge mólsherinde syıaqy berse, zalal somasyn azaıtýǵa bolady dep kórsetýi tıis boldy. Osyndaı ótinishpen tehnıkalyq dırektor kompanııanyń quryltaıshylaryna barady.
Alaıda JShS basshylyǵy para berýden bas tartyp, quqyq qorǵaý organdaryna habar beredi. Nátıjesinde, ekologııa departamentiniń bas mamany jáne JShS tehnıkalyq dırektory aqsha alý barysynda qylmys ústinde ustaldy. Sottalýshynyń kinási kýágerlerdiń aıǵaqtarymen, jasyryn tergeý áreketteriniń materıaldarymen, sondaı-aq moıyndaý aıǵaqtarymen dáleldendi. Bul jaǵdaıda prokýror aıyptalýshyny 4 jylǵa bas bostandyǵynan aıyrýdy surady. Al qorǵaýshy tarap jumsaq úkim shyǵarýdy ótindi.
Aıta ketý kerek, Qylmystyq kodekske sáıkes, mundaı qylmys úshin 7 jylǵa deıin bas bostandyǵynan aıyrý jazasy qarastyrylǵan. Jazany tańdaý kezinde sot aıptalýshynyń shyn júrekten kinásin moıyndaǵanyn jáne ózi jalǵyz kámeletke tolmaǵan bala tárbıelep otyrǵanyn eskerip, bul jaıttardy kináni jeńildetetin mán-jaı dep qarastyrdy.
Alaıda kináni aýyrlatatyn mán-jaı da joq emes – ol qyzmetkerdiń qabyldanǵan antyn buzýy.
«Sot úkimimen K. úkimdi oryndaý merzimin 5 (bes) jylǵa deıin uzarta otyryp, biraq bala on tórt jasqa tolǵanǵa deıin 3 jylǵa bas bostandyǵynan aıyrylady. Sondaı-aq sottalǵan adam ómir boıy memlekettik qyzmette jumys isteý quqyǵynan aıyryldy. J-ǵa qatysty (JShS tehnıkalyq dırektory) qaıtys bolýyna baılanysty is toqtatyldy», dep habarlady Qaraǵandy qalasy Qazybek bı aýdandyq sotynyń baspasóz qyzmeti.
Sot úkimi zańdy kúshine engen joq.
